Митови за дебелеење во менопауза во кои не треба да верувате (и како да ослабите)

Дебелеењето во менопауза е честа појава кај жените, најчесто предизвикано од хормоналните промени, но тоа не значи дека е безопасно и дека треба да го игнорирате.

Периодот пред и по почетокот на менопаузата може да биде особено тежок за секоја жена.

Поради хормоналните промени, жените се соочуваат со низа (непријатни) симптоми, а еден од нив е и дебелеењето.

А, кога станува збор за дебелеење во менопауза, постојат навистина многу митови кои не се точни, а можат да бидат и штетни.

Кои се најчестите митови на кои не треба да верувате, но и како да ја регулирате тежината во овој период од животот?

Мит 1: Вие сте виновни за дебелеењето во менопауза

Секако дека начинот на исхрана и физичката активност имаат влијание, но самите хормонални промени се исто така голем „виновник“.

Поради ова, се случува и жени кои се хранат здраво и редовно вежбаат да се здебелат во менопауза.

Се претпоставува дека најголемо влијание врз тежината има естрогенот.

Во менопауза, нивото на естроген се намалува. Кога естрогенот е намален, желбата за храна се зголемува, а се намалува и физичката активност.

Ниското ниво на естроген може да го забави и метаболизмот, што значи масните наслаги се таложат побрзо.

Постојат и други фактори кои можат да поттикнат дебелеење во менопауза. На пример, со возраста, повеќето жени намалуваат со физичка активност.

Покрај тоа, кај повозрасните жени побрзо се губи мускулната маса, што го забавува метаболизмот, а го прави дебелеењето полесно.

Мит 2: Дебелеењето почнува дури во менопаузата

Промените во телото не настануваат кога целосно ќе прекине менструалниот циклус, а самата менопауза се одвива во неколку фази.

Најпрво почнува период познат како перименопауза и тогаш почнува да се намалува нивото на естроген. Поради ова, дебелењето може да почне уште во перименопауза.

Овој период менструацијата може да биде нередовна, но не прекинува.

Кога ќе поминат 12 и повеќе месеци од последната менструација, тогаш е почната менопаузата.

Но, периодот од перименопауза до менопауза може да трае и неколку години.

Мит 3: Не треба да се грижите ако се здебелите во менопауза

Иако за дебелеењето се одговорни многу фактори, тоа не значи дека вишокот килограми нема да претставуваат проблем.

Вишокот килограми го зголемува ризикот од бројни проблеми со здравјето како дијабетес, висок крвен притисок, замастен црн дроб, проблеми со менталното здравје…

Што значи, важно е да водите грижа за здравјето и во менопауза.

Како да го спречите дебелеењето во менопауза (или како да ослабите)?

Јасно е дека вежбањето и здрава исхрана се клучни во овој случај.

Најдобро е да намалите со многу преработена храна и повеќе да се фокусирате на свежи продукти.

Избегнувајте многу шеќер и најголемиот број калории внесувајте ги од протеини и зеленчук.

Исто така, потрудете се поголемите оброци да ги јадете порано во денот, за да можете да ги согорите мастите и калориите.

Кога станува збор за вежбање, тоа зависи од вашите цели.

Генерално, најдобро е да одвоите 150 минути неделно за некаква физичка активност.

За најдобри резултати, препорачливо е да ги комбинирате вежбите во текот на една недела.

На пример, аеробните вежби ги намалуваат масните наслаги, вежбањето со тегови ја зголемува мускулната маса, додека јогата и пилатесот ја зголемуваат флексибилноста и ги зајакнуваат коските и мускулите.

Ако не сте сигурни од каде да почнете со вежбање, секогаш е добро да се консултирате со професионалец.

Покрај слабеењето, постојат и други придобивки од вежбање по менопауза, како:

• Намален ризик од остеопороза
• Намален ризик од проблеми со срцето
• Зголемена отпорност на инсулин
• Одржување на здравјето на зглобовите и мускулите
• Одржување на здравјето на дигестивниот систем
• Намалени симптоми на депресија и анксиозност
• Подобрено целокупно здравје

Спирова С. | Црнобело