Александар Василевски, наш јутјубер во Малта: „Си купив стан, а мажите локалци и до 35-тата година живеат со родителите“

Детали

вторник, 06 јуни 2023

„Локалците во типичните малтешки села имаат навика да испечат локален колач и да ве повикаат на колач и кафе или подготвуваат домашна пица и ве повикуваат да играте „Бинго“ или „Не лути се човече“. Богатите Малтежани од централниот дел ве повикуваат на порачана храна во нивниот пентхаус или викаат готвач да направи скара за сите, а еднаш месечно прават шопинг патување во Италија и Сицилија“, раскажува Александар Василевски од Скопје за CRNOBELO.com, на кој Малта веќе 8 години му е дом.

Александар Василевски од Скопје откако дипломирал економија на Европскиот универзитет во 2011, заминал во Дубаи за да го усоврши англискиот јазик и да добие интернационално искуство во областа на маркетингот.

По 4 години во Дубаи, одлучил да го продолжи својот авантуристички живот во островска земја.

Првенствено тоа требало да биде на Малдиви, но по длабоко истражување сфатил дека тие острови нема да ги задоволат неговите критериуми во целост и тука се родила идејата за живот во Малта.

Сега вели дека ја обожава оваа островска држава со големина на неговиот роден град Скопје.

Во интервју за CRNOBELO.com тој споделува како му изгледа животот таму:

Работиш како јутјубер на Малта? Дали се издржуваш само од тоа или имаш и друга професија?

Работата како јутјубер на Малта се роди многу спонтано во времето на пандемијата.

Изградив канал каде што ја претставувам Малта за туристите во еден дел и Малта за луѓе кои се дојдени да живеат таму во друг дел.

Каналот е монетизиран, иако има повеќе од 3 милиони прегледи сè уште е во развој. Од Јутјуб би можел да живеам прилично нормален живот на Малта, но мојата примарна професија е фронт офис менаџер во хотел, каде што работам веќе осма година.

Ти пречат ли некогаш туристите во секојдневното функционирање?

Туристите не ми пречат во секојдневното функционирање, напротив ја користам секоја можност да научам нешто од туристите кои доаѓаат од секаде.

Долови ни ја атмосферата за живот таму... Што оттаму би си посакале во Македонија?

За Малта кажувам дека има некоја посебна позитивна енергија, повеќе од 300 денови во годината се сончеви и топли, тука нема снег.

Локалците се позитивни, насмеани, но и многу гласни, туристите се сите насмеани и среќни, можеби затоа што во ноември и декември се по кратки ракави на плажа, а доаѓаат од држави со температури под нула.

Малта е остров од жолт камен, па на времето сите локалци ги граделе своите куќи од истиот камен и сега Малта е претежно жолта, со многу палми и кактуси во зелена боја, небо и море во сина боја. Комбинацијата од овие 3 бои буквално ја прави Малта да изгледа како од сликовница.

Кој ти е најдобар начин за забава таму? Имаш ли локалци пријатели?

Најдобар начин за забава се баровите каде по работа се минуваат неколку часа со колеги, и исто така ден поминат во еден од клубовите со базен. Јас не сум по ноќниот живот, ниту ноќна птица.

На Малта имам повеќе локалци за пријатели, отколку Македонци.

Има ли разлика во цените во туристичките места и местата на локалците? 

Има разлика, на пример пица капричиоза во туристичкиот дел на Малта е од 9 до 13 евра во зависност од ресторанот, а во периферниот дел истата пица е 6.50 евра.

Какво темпо на живот водат локалците? Имаат ли интересни навики во секојдневието? 

Локалците се многу кул народ, повеќето сакаат да работат скратено работно време во администрација за да имаат повеќе време за шетање.

Интересно е да се знае дека голем број од мажите на Малта остануваат да живеат со нивните родители и после 35-тата година. Најчесто локалците во текот на летото се собираат на ниви или плажи и прават скара.

Некоја цена оттаму за кафе/пиво...

Капучино е 1.95 евра почетна цена во кафулиња/ресторани, пиво од 2.50 евра, па нагоре.

Продолжува на следната страница...