Дали знаете што значи Green Dot?

Детали

среда, 06 март 2013

Купувањето на основните животни намирници - храна или пијалоци,  претставува дел од нашето секојдневие и нешто во кое навистина уживаме. Притоа, амбалажата е она што најпрво го забележуваме на некој производ.Нејзиното визуелно решение, естетиката, колоритот, етикетата, сето тоа не привлекува да го земеме производот во раце и да се информираме за состојките, потеклото на производот или рокот на употреба. Но, малкумина од нас размислуваат за тоа што ќе  се случи со амбалажата откако ќе го искористиме производот и  ретко кој ги забележува знаците на амбалажата кои даваат информации за тоа дали пакувањето ќе се селектира и рециклира по употребата. Дали сте го забележале знакот кој потсетува на јинг јанг симболот и на рециклирачкиот симбол на Гери Андерсон - Green Dot знакот ?

Green Dоt е една од најпопуларните ознаки кои информираат за тоа што ќе се случи со амбалажата. Таа претставува ознака (заштитен знак - лого) која се става на амбалажата на производот, а која на потрошувачот му дава до знаење дека откако производот ќе биде потрошен, а амбалажата ќе се фрли, постои некој кој ќе се погрижи за тоа амбалажата да ја собере и да ја реупотреби.

Green dot, како систем за собирање и селектирање на амбалажниот отпад, за прв пат се појавува во осумдесеттите години во Германија, а набрзо  станува популарен и започнува да се проширува во поголемиот дел на Европа, по што германската компанија DSD одлучува соственоста и координацијата за логото за употреба надвор од Германија, да и ја препушти на интернационалната мрежа за управување со амбалажен отпад -  PRO-Europe од Брисел.

Оттогаш интернационалната PRO-Europe  има овластувања  за употреба на логото Green dot - заштитена трговска марка, кој означува дека за пакувањето што го има тој знак е платен надомест за постапување со отпадот по употребата. За секоја територија  една национална компанија, која е членка на оваа организација, и е носител на ексклузивна лиценца над овој знак, со што е овластена да состави систем за употреба на знакот на територијата на својата земја, како и да подготвува договори со поединечни компании- кориснички.

Таква компанија во Македонија е Пакомак, која е прва компанија во Македонија што поседува дозвола за селекција и преработка на отпад од амбалажи. Основачи на компанијата се 11 водечки производствени компании во Македонија, а од 2011 година Пакомак е 34-тата национална непрофитна компанија што се приклучува кон ProEurope.