7 помалку очигледни симптоми за рак на кожата што не треба да ги игнорирате

Чешањето, но и необјаснивите болки во зглобовите кои траат долго или се засилуваат, некогаш можат да бидат симптом за рак на кожата.

Ракот на кожата претставува абнормален раст на кожните клетки. Обично се појавува на делови од кожата кои се често изложени на сонце, но може да се јави и на други места.

Постојат неколку видови рак на кожата и болеста се третира од зависност на типот.

Постојат и разни причини за појава на рак на кожата, а најдобриот начин да си го намалите ризикот од неговата појава е соодветно да ја заштитувате кожата од сончева светлина.

Односно, не престојувајте долги периоди на сонце, особено кога УВ зрачењето е силно, и задолжително нанесувајте крем со висок заштитен фактор дури и кога облачно.

Кои се помалку очигледни симптоми на рак на кожата?

Обично ракот на кожа е придружен со видливи симптоми како необични промени на кожата, но и бенки со чудна форма.

Но, постојат и симптоми кои не се многу очигледни, а можат да се јават доколку ракот почне да се проширува.

Важно е да знаете само затоа што некогаш ќе почувствувате некој од следниве симптоми, не мора да значи дека сигурно имате рак на кожата.

Но, доколку симптомите траат подолго време или ви изгледа како да се влошуваат, препорачливо е да се консултирате со лекар.

Чешање

Чешањето е еден од можните симптоми на рак на кожата.

Ако подолг период чувствувате чешање на едно место, без притоа никаква причина (како убод од инсект или алергија), добро би било да не го игнорирате.

Испакнатини

Друг можен симптом се мали испакнатини под кожата.

Немојте да ги игнорирате ни испакнатите и отоците во областа на вратот и пазувите каде што се наоѓаат лимфните жлезди.

Болка во зглобовите

Необјаснивата болка во зглобовите може да биде уште еден знак.

Некогаш ракот се проширува и на коските, па може да предизвика болка.

Доколку немате здравствени проблеми или повреда, а чувствувате постојана болка во зглобовите, консултирајте се со лекар.

Трнење

Ракот може да се прошири и на нервите, па да почне да предизвикува трнење на екстремитетите.

Повременото трнење може да се јави од разни причини, но ако трае долго или се засилува, не го игнорирајте.

Болки во стомакот

Некогаш и болките во стомакот без навидум нeкаква причина може да се знак дека ракот се проширил.

Тешкотии со дишењето

Кај некои лица можат да се јават и симптоми како задушување, постојана кашлица и отежнато дишење и голтање.

Проблеми со видот

Ако ракот е во близина на очите, може да предизвика и проблеми со видот, како замаглување.

Што да правите ако забележите симптом?

Уште еднаш нагласуваме дека сите овие симптоми можат да бидат предизвикани од бројни други работи, вклучувајќи и здравствени проблеми кои не се опасни по здравјето.

Односно, ако, на пример, ве боли стомакот 2-3 дена и не знаете зошто, не мора да паничите дека имате рак или друга сериозна болест.

Но, доколку траат долго, доколку се влошуваат или доколку чувствувате комбинација од повеќе симптоми, секогаш е добро да се консултирате со лекар.

Спирова С. | Црнобело