Ротавирус кај деца: Кои се симптомите и колку е опасен?

Ротавирусот многу лесно се пренесува и може да преживее неколку часа на неизмиени раце. Затоа, хигиената е клучна за да се спречи неговото ширење.

Вирусите се најчести причинители на гастроинтестинални инфекции кај деца на возраст од 6 месеци до 5 години, а еден од нив е и ротавирусот.

Ротавирусите се РНК вируси кои припаѓаат на семејството Reoviridae. 

Овој вирус го добил своето име по неговиот карактеристичен изглед на тркало кога се гледа под електронски микроскоп (rota на латински значи тркало).

Што треба да знаете за овој вирус, особено ако имате мали деца?

Симптоми

Главните симптоми на болеста се треска, гадење, болки во стомакот, повраќање и дијареја кои во зависност од интензитетот може да доведат до дехидрација. 

Се разбира, не мора сите деца да ги имаат сите симптоми, а сериозноста на симптомите исто така варира. 

Некои може да поминат со поблага клиничка слика - на пример, доените деца кои се заштитени со антителата на мајката. 

Времетраењето на болеста е променливо, од неколку дена до 2 недели, а периодот на инкубација е од 12 часа до 4 дена.

Како се пренесува и колку е заразен?

Вирусот е многу лесно пренослив и многу заразен. 

Причината е тоа е што за инфекција е потребна само мала количина вирус, а начинот на пренесување е повеќекратен: преку валкани раце и уста, и преку капки. 

Најчесто децата се разболуваат од овој вирус во зимскиот период.

Вирусот може да преживее неколку часа на неизмиени раце, а уште подолго на контаминирани предмети и во храна. 

Кога вирусот ќе влезе во телото, тој се размножува во тенкото црево, предизвикува непријатност и се излачува во столицата. 

Затоа, исклучително е важно да се внимава на хигиената на рацете и облеката, како и на сите површини и играчки кои го опкружуваат детето за да се спречи ширење на инфекцијата. 

Но, поради високата заразност и можноста за пренос преку капки, дури и високо ниво на хигиена не може целосно да го искорени вирусот.

По болеста, имунитетот ослабува, па детето може повторно да се разболи, но клиничката слика тогаш е полесна. 

Колку е опасен овој вирус?

Заразата со ротавирус може да биде опасна, а во сериозни случаи и да го загрози животот на детето. 

Малите деца полесно дехидрираат, а честото повраќање и дијареја може да доведат до нарушување на електролитната рамнотежа и да дојде до шок.

 

Како се лекува?

Болеста поминува сама по себе, односно не постои конкретен лек за неа.

Најважната мерка за време на болеста е да се одржи добрата состојба на детето и да се спречи значителна дехидрација.

Пробиотиците заедно со внесот на течности можат донекаде да го скратат времетраењето на дијарејата. 

Исто така, постои и вакцина за ротавирус за која треба да се консултирате со вашиот лекар.

Доколку вашето дете покажува какви било симптоми на болеста, важно е да се консултирате со лекар кој ќе ви каже како да се справите со симптомите и да ги избегнете компликациите.

С. Ш. | Црнобело / фото: freepik.com