Депресија за време на бременост – кои жени се изложени на најголем ризик и како да ја препознаете?

Пренаталната депресија е ментално нарушување за време на бременоста и важно е да побарате помош бидејќи во посериозни случаи, може да доведе до мисли за самоповредување, па и самоубиство.

Секоја жена слушнала за постпородилна депресија, но знаевте ли дека депресијата може да се јави и за време на бременоста?

Ова ментално нарушување, познато како пренатална депресија, не треба да се игнорира и доколку чувствувате симптоми, важно е да се консултирате со експерт.

Што треба да знаете за пренатална депресија?

Што претставува пренатална депресија и во кој период од бременоста се јавува?

Депресијата е ментално нарушување кое предизвикува постојани чувства на тага и безнадежност.

Кај оние кои страдаат од нарушувањето, може да се изгуби интересот за работи кои претходно им причинувале задоволство, а можат да почнат и целосно да се изолираат.

Во посериозни случаи, лицата со депресија може да почнат и да се самоповредуваат, па и да посегнат по својот живот.

Генерално, симптомите на пренатална депресија се исти како и вообичаената депресија.

Разликата е во тоа што се јавува за време на бременост.

Кој е изложен на поголем ризик?

Секоја жена може да се соочи со пренаталната депресија.

Но, постојат и ризични фактори, како семејна историја на проблеми со менталното здравје или претходно искуство со депресија, анксиозност и слични нарушувања.

Истовремено, пренатална депресија почесто се јавува кај жени кои:

• Носат дете со здравствен проблем или посебни потреби
• Се бремени во стресен период од животот, како развод, финансиски проблеми и слично
• Очекуваат близнаци или тројка
• Не ја планирале бременоста
• Немаат партнер, пријатели или семејство како поддршка за време на бременоста
• Имале проблеми со плодност пред да зачнат

Кои се симптомите на пренатална депресија?

Чувствата на тага, анксиозност и грижа се нормална појава кај секого, дури и кај бремените жени.

Но, штом симптомите траат подолго од неколку недели или се влошуваат, тогаш можно е да станува збор за пренатална депресија.

Дел од симптомите се:

• Анксиозност, претерана грижа и нерационални мисли
• Промени во апетитот и нагло слабеење или дебелеење кое не е поврзано со бременоста
• Намален интерес за активности во кои претходно сте уживале
• Изолирање од саканите
• Замор, поголема потреба за сон, но и инсомнија
• Чувства на тага, безнадежност, „празнина“, вина…
• Раздразливост, често плачење и други чести и нагли промени во расположението
• Намален интерес за секс или за партнерот воопшто
• Физички симптоми без друга причина, како главоболка, проблеми со дигестивниот систем или болки во мускулите
• Проблеми со концентрацијата и помнењето

Во посериозни случаи, може да се јават и мисли за самоповредување или самоубиство.

Како се лекува пренаталната депресија?

Особено е важно да побарате помош доколку ги чувствувате овие симптоми.

Депресијата е нарушување кое може да се излечи и не треба да страдате, па и да си го ризикувате животот.

Денес постојат разни третмани за депресија и психолог или психијатар може да одреди кој е најдобриот за вас.

Покрај антидепресиви, постои терапија со разговор, како и когнитивно бихевиорална терапија.

Немојте сами да ја лекувате пренаталната депресија, особено не со лекови бидејќи некои антидепресиви и седативи може да не бидат погодни за бремени жени.

Побарајте помош и поддршка од професионалец, како и од најблиските луѓе во вашиот живот.

Спирова С. | Црнобело