Чекори за подобар сон

Иако е добро позната здравствената вредност на квалитетниот сон, многу луѓе од различни мотиви пропуштаат да ги отспијат потребните 8 часа дневно.

 

Научниците препорачуваат неколку совети за оние кои не успеваат да се наспијат.

Ограничете го внесувањето на кофеин
Од 14 часот па натаму не е препорачливо да пиете кофеински пијалоци, а 17 часот е апсолутно крајна граница ако сакате да заспиете до полноќ. Потребни се 6 часа за да се разгради кофеинот и да му опаднат ефектите.

Не вежбајте доцна
Вежбањето и другите телесни напори поволни се за здравјето, но никако 2 часа пред да си легнете. Најдобро е да завршите со активностите до 19 часот. Причина за ова е фактот што телото паѓа во сон кога температурата ќе му падне за еден степен подолу од “дневната“. Ако телото е уште “жешко“, ќе ви биде потребно повеќе време за да заспиете.

Не размислувајте за работата доцна навечер
Голем број луѓе имаат грижи и одговорности, но со нив е подобро да се занимавате за време на првиот дел од денот, кога организмот е прилагоден за такви актвиности. Размислувањето навечер го отежнува заспивањето , и го ослабнува организмот и неговата способност да се снаоѓа во стресни околности. Квалитетното спиење ве прави повеќе отпорни на стрес, а и побистри за да се справувате со идните ситуации.

Воспоставете правилен ритам на спиење
Одморајте се во исто време и спијте подеднаков број на часови. Топла бања пред спиење може да ви помогне за полесен сон. Пред да легнете изгасете ги светлата и сè што произведува бука. Ако постои галама надвор, послужете се со чепови за уши.