Ако седите долго на компјутер

Доколку сте еден од оние кои поминуваат многу време седејќи пред компјутер, ви предлагаме неколку вежби за истегнување против познатата вкочанетост.

 

Како и кај секое статичко истегнување обидете се да се задржите во одредена положба 20-30 секунди без поместување.

Исто така обидете се овие вежби да ги правите во текот на денот, за да секој час станете од столот, малку се раздвижите и истегнете.

1. Истегнување на трапезниот мускул

За да ги истегнете мускулите кои се протегаат преку грбот и десната страна на вратот, нежно испружете ја десната рака зад грбот, а десното рамо спуштете го, додека ја кревате левата рака над главата и нежно спуштете го левото уво покрај левото рамо.

Задржете се во таа положба 20-30 секунди, а потоа свртете ја главата и погледнете надесно, па истегнете ја главата надолу до агол од 45 степени за да го зголемите интензитетот на истегнувањето. Правете ја оваа вежба секогаш кога ќе почувствувате дека вратот и рамениците ви се вкочанети.

2. „Прегрнете го стеблото“

Оваа вежба е за истегнување на грбните мускули, долниот дел од грбот и рамената. Одлична е за оние кои седат цел ден и чувствуваат напнатост во долниот дел од грбот и вратот.

Најдете цврста површина во вид на стебло (може да го искористите држачот за полици или нешто слично) и обвиткајте ја со рацете, додека нозете ви се одалечени од таа површина на околу 30 сантиметри.

Наведнете се нанапред се додека рацете не ви бидат сосема испружени, а главата нека ви биде опуштена меѓу лактовите. Останете во оваа положба 20-30 секунди.

3. Истегнете ги подлактиците

За да ги истегнете мускулите на зглобовите и подлактиците спојте ги дланките, а прстите насочете ги нагоре и полека спуштајте ги дланките надолу додека не почуствувате истегнување на внатрешноста на зглобовите. Останете во таа положба 20-30 секунди.

4. Истегнување на прстите и зглобовите

За да ги истегнете прстите и зглобовите (во насока спротивна на претходната), спојте ги дланките, но така што ќе се допираат горните делови на дланките или пак положете ги рацете на маса, со дланките нагоре и со мал притисок истегнете ги прстите и зглобовите.