Пар ја истражува Македонија спиејќи во комбе: „Крушево е рај за кампери, нѐ дочека есенска идила“ (фото)

Детали

недела, 01 ноември 2020

„Правевме компот од круши и дуњи и спиевме покрај Крушевското Езеро, со поглед каков не нуди ниту еден хотел“, ни раскажуваат Ана (24) и Ненад (27).

Ана Јаневска (24) и Ненад Лазаров (27) се авантуристички пар кој обожава природа, па така тие од старо комбе направиле кампер со кој ќе можат да уживаат во убавините на нашата држава, а во иднина и надвор од нејзините граници.

„Идејата и целта да се направи вакво комбе беше да се помине повеќе време во природа со сите основни услови за живеење. Па така од старо комбе ние направивме нешто што ќе ни служи како смештај за сите наши идни патувања. Бидејќи релативно кратко време го имаме комбето, околу половина година, нашите авантури допрва почнуваат.

Но, неодамна го посетивме Крушево и воодушевени сме од есенската идила со која нѐ пречека овој град“.

За нивниот престој тие раскажуваат за CRNOBELO:

„Крушево е еден од ретките градовите во кои може да се почувствува и природата и градот во едно. Одлучивме да го посетиме Крушево пред сѐ заради неговата интересна местоположба која изобилува со многу зеленило и чист воздух.

Бидејќи патувавме со комбе, а воедно тоа ни беше и сместувањето, сакавме да најдеме место далеку од градот, а сепак блиску до сите интересни работи кои може да се видат.

Па, така по 2 часа патување пристигнавме и се сместивме на Крушевското Езеро.

Слободата во тоа да имаш комбе/кампер е да си бираш место каде сакаш да спиеш, далеку од гужвата и да уживаш во убав поглед кои ни луксузните хотели го немаат. Така што, ако некој сака да кампува, Крушево е интересно место за кампување кое нуди плус активности за занимација.

Имавме и супер друштво, дечки кои исто така нивното комбе го имаат направено кампер, па така заедно три дена се дружевме, правевме вкусен компот од круши и дуњи и шетавме низ прекрасното Крушево.

Освен познатите обележја на Крушево, Македониумот, Мечкин Камен, Музејот на Тоше има многу убави скриени места во природата кои со есенските бои даваат друга димензија.

Како едно од тие места ќе го издвојам селото Пуста Река во близина на Крушево (на 14 километри од него), кое со своите стари градби, гостопримливи луѓе и живописна природа ни го задржа вниманието. Исто така таму има мали црквички со интересна архитектура, кои може да се посетат.

Продолжува на следната страна...