Добре (31) е Македонец роден во Швајцарија: „Мајка ми дошла тука на 14 години, дома и денес се зборува само македонски“

Што студираше во Швајцарија? Каков е образовниот систем во земјата?

Во Швајцарија го завршив Executive Master in Business Administration, каде што стекнав практично ориентирано знаење во менаџмент, лидерство и стратешко размислување.

Во март 2026 го завршив и Master of Science in Political Management во Лондон, со што дополнително се насочив кон политичкиот и јавниот сектор.

Образовниот систем во Швајцарија би го опишал како структуриран и практично ориентиран, со силна поврзаност со пазарот на труд.

Една од неговите најголеми предности е дуалниот систем, каде што младите паралелно учат и работат, што им овозможува уште рано да стекнат конкретни вештини и искуство.

Во споредба со Македонија, разликата најмногу се гледа во практичната примена на знаењето и поврзаноста со економијата.

Додека во Македонија системот е повеќе теоретски ориентиран, во Швајцарија фокусот е на вештини, примена и рана професионална ориентација.

Што значи Leadership expert in Army? Што опфаќа твојата работа, раскажи ми малку повеќе за тоа...

Терминот Leadership expert in Army се однесува на специјализирана обука и експертиза во областа на раководење во воен контекст.

Во мојот случај, ја завршив обуката за Eidgenössischer Führungsfachmann на Високата кадарска школа на армијата, која трае околу една и пол година и е наменета за кадарски позиции.

Оваа обука е интензивна и комбинира практични и теоретски елементи, со силен фокус на лидерство, донесување одлуки под притисок, управување со тимови и координација во комплексни и динамични ситуации.

Се работи со реални сценарија, стратешко планирање, комуникација и развој на одговорност при водење на луѓе, што поставува високи стандарди за дисциплина и ефикасност.

Покрај тоа, обуката опфаќа и економски и менаџерски предмети кои мора успешно да се положат.

Со нејзиното завршување се добива државно признат стручен сертификат, таканаречен Fachausweis, кој претставува важна квалификација во швајцарскиот образовен систем и отвора можности за понатамошно образование на високи стручни школи и универзитети.

Во македонски контекст, овој Fachausweis може да се спореди со високо стручно образование или специјализирана диплома по завршена стручна обука, со силен практичен и професионален фокус, која има тежина на пазарот на труд и претставува мост кон понатамошно академско надградување.

Во изминатите осум години се посветив на градење на сопствена компанија во безбедносниот сектор, која ја развив од едноставна индивидуална фирма во акционерско друштво.

Овој процес го водев паралелно со моето образование, ангажманот во армијата и други професионални обврски, што бараше високо ниво на дисциплина, организација и истрајност.

Во 2023 година, на барање на третата по големина компанија за безбедност во Швајцарија, ја прифатив позицијата регионален директор со јасна задача да се справам со конкретен економски предизвик.

Во рок од една година успеав да го стабилизирам и решам проблемот, а втората година ја посветив на градење и интеграција на мојата наследничка, која и денес успешно ја извршува функцијата регионален директор.

Денес повторно сум целосно фокусиран на сопствената компанија како нејзин сопственик.

Тоа ми дава слобода да ја реализирам мојата визија, да носам одлуки самостојно и да градам нешто што има долгорочна вредност.

Искрено сум многу задоволен од патот што го изодев и горд на тоа што го постигнав, бидејќи зад секој чекор стои труд, дисциплина и јасна цел.

Имаш ли некое интересно хоби или страст?

Имам повеќе интереси кои за мене претставуваат важен баланс помеѓу професионалниот и личниот живот.

Посебно место има спортот на издржливост.

Редовно трчам маратони и ултрамаратони, а во моментов активно се подготвувам за триатлон, со цел оваа година во октомври да го завршам мојот прв целосен Ironman.

За мене тоа не е само физички предизвик, туку и ментална дисциплина, фокус и надминување на сопствените граници.

Покрај тоа, често поминувам време во природа, особено преку планинарење со моето куче, што ми овозможува да се исклучам од секојдневниот ритам и да најдам внатрешен баланс.

Параглајдингот исто така има посебно значење за мене, бидејќи комбинира слобода, концентрација и доверба во сопствените способности.

Интерес имам и за стрелаштво, кое го практикувам со сериозност и одговорност, како и за читање.

Не читам површно, туку кога некоја книга ќе ме заинтригира, целосно се внесувам во неа и ја доживувам како процес на продлабочување на размислувањето и разбирањето.

Дали некогаш си размислувал да дојдеш во Македонија и да го пренесеш своето експертско знаење од областа а безбедноста и тука?

Да, сум размислувал за тоа и таа мисла ме следи веќе подолго време.

Сепак, за мене е важно таквиот чекор да биде природен и од двете страни да постои јасна волја и отвореност за соработка.

Не се работи за наметнување, туку за вистинска можност да се придонесе таму каде што има простор и подготвеност за тоа.

По завршувањето на моите политички студии, сериозно размислувам да иницирам невладина организација, насочена кон антикорупција и поддршка на младите.

Во текот на моето истражување изминатата година, имав можност да запознаам многу талентирани и способни луѓе во Македонија.

Она што го забележав е дека тие често се ограничени во својот развој и делување поради структурни и политички бариери, наместо да бидат поттикнати да напредуваат.

Верувам дека токму тука постои простор за вистинска промена.

Мојата желба е да се создаде средина во која младите ќе можат слободно да се развиваат, да преземаат иницијатива и да придонесуваат без ограничувања.

Ако треба да бидам искрен, мојот животен сон е еден ден да засадам семе во Македонија кое со текот на времето ќе прерасне во нешто одржливо и вредно.

Да се создадат услови каде институциите функционираат независно, а луѓето имаат можност слободно да се изразуваат и напредуваат.

Да се биде сведок на таков развој би било нешто што има длабока лична вредност за мене.

Повеќе фотографии на следната страница...