Бисера од Скопје направи свадба на Бали со партнерот од Босна: „Имавме 50 гости од цел свет, мајка ми ја шиеше венчаницата преку видео повик“

Како изгледаше свадбата? Каде се одржа и кој ти беше најубавиот момент?

Свадбата беше буквално како што замислувавме. Се одржа во вила покрај плажа, со многу зеленило, свежи цвеќиња и трепкави светла.

Целата свадба беше надвор на отворено, и иако беше многу топло (околу 28 степени), свежината од океанот придонесе да има убава атмосфера.

Најубавиот момент ми беше церемонијата, потоа говорите, а и крајот кога сите завршивме во базен, со сè вештачки трепки!

Да бидам најискрена, омилениот дел ми беа гостите – бидејќи сè можеш да организираш, да платиш и да планираш, меѓутоа расположението е тоа што ја прави свадбата убава, а нашите гости беа ептен весели – мислам дека не седнавме цела ноќ!

Тортата ја пробавме дури следниот ден.

Какви се свадбите таму? Имаше ли класични порции и пијалаци како кај нас, каков беше концептот?

Има секаков вид на опции, од класични порции до шведска маса. Ние одбравме порции за делење (sharing plates) кои беа послужени на средина на масите. Имаше опции за индонезиска или западна храна, каде што ние одбравме микс.

Предјадењето и главното јадење беа во западен стил, месо, салати, њоки и слично, додека десертите беа традиционални индонезиски (освен тортата).

Од пијалоци имаше сè од шампањ, пиво, вино, жестоко и коктели. Секако и тука имавме опција да бираме – па одбравме сè (балкански хаха).

Како реагираа локалците на балканска забава?

Дефинитивно имаше неколку вработени што нè снимаа додека игравме, не верувам дека виделе такво нешто досега, што нас ни беше ептен слатко – дефинитивно ќе нè паметат!

Како се подготвуваше ти како невеста и гостинките со шминка и фризура? Скапи ли се таквите услуги?

Организирав шминка и фризура за мене и другарките (и мајките), и ние се подготвувавме во главната соба со тим од 4 шминкери/фризери.

Дефинитивно знаат што прават, бидејќи времето беше многу влажно и мене ми беше важно да ми издржи косата пред сè (а природно ми е виткана, што не е добра комбинација со влажно време).

Сите беа задоволни, а цените се можеби малку поскапи од кај нас, но не премногу.

Имаше ли нешто што ве изненади позитивно или негативно таму? Некоја неочекувана или несакана ситуација?

Искрено, не очекувавме дека ќе има толку гости. Уште кога ги праќавме поканите ни беше јасно дека има луѓе кои нема да можат да присуствуваат од различни причини, сепак се работи за голема далечина.

На наше изненадување, скоро сите пријатели најдоа начин да бидат таму за тој огромен момент – тоа е нешто што многу ни значи и секогаш ќе го вреднуваме.

Негативно – фактот дека се очекуваше да врне дента на свадбата, а ние одлучивме да ризикуваме и да не поставиме шатори. На крај, имавме голема среќа и цел ден блескаше сонце.

Што те воодушеви од Бали? Би се вратила ли таму?

Самиот остров е прекрасен, без разлика дали се работи за крајбрежјето, или џунглата која го опфаќа целиот среден дел на островот – Бали има богата култура и дефинитвно вреди да се посети.

А локалците се нешто посебно – таква услуга и желба да се помогне не сме виделе никаде на друго место, префини и многу искрени.

Сега Бали е посебен дел од нашите срца, и сигурно планираме да се вратиме.

Повеќе фотки од свадбата на Бисера и Борис на Бали:

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело