Дац и Александар промовираа плоча - постхумно му подарија винилка на Драган Б. Костиќ, ја направија црвена како бојата на љубовта

Детали

четврток, 02 јули 2026

„Плочите во мое време беа црни, ама сега кога разбрав дека може да бидат во боја, ја направивме црвена, како бојата на љубовта. Од срце“, рече Дац, кој заедно со Александар ја промовираа својата прва винилка, насловена „Уште ми фалиш“.

Александар Митевски и Драган Спасов Дац денеска ја промовираа својата прва плоча, „Уште ми фалиш“, со дел од нивните најпопуларни песни.

Ова винил издание е во црвена боја, а на омотот е насликана чаша со „истурено вино“, износени патики и машината за пишување, која е нивен заштитен знак и која се провлекува во спотовите, а сите „направени од хартија“.

На промоцијата, која се одржа во пријатна атмосфера, двајцата пријатели и долгогодишни соработници, кажаа дека плочата ја најавиле на својот концерт „Дамите бираат“ во МНТ, а сега се пресреќни што таа конечно излезе и ќе биде достапна и на јавноста.

„Зошто плоча? Затоа што плочата не можеш да ја изгубиш како USB, не можеш да ја оштетиш како CD. Таа останува трајно. Не велам дека со шајка не можеш да ја изгребеш, но која будала би гребела плоча со шајка?

Плочите во мое време беа црни, ама сега кога разбрав дека може ваква да биде, ја направивме црвена, како бојата на љубовта. Од срце“, рече Дац.

По ова, микрофонот го зеде Александар, па продолжи онаку каде што застана Дац.

„Посебно сме горди што успеавме таа романтика што ја носиме во нашите песни да го заробиме во едно парче винил, за да остане за сите времиња“, кажа Александар.

Тој откри дека меѓу гостите на промоцијата се и најблиските на починатиот диско селектор Драган Б. Костиќ и дека ним, тој и Дац ќе им подарат една плоча, за да стои во неговата огромна колекција.

„Драган беше наш голем пријател и многу ми фали. Би сакал да го поздравиме со аплауз, големите уметници се поздравуваат со аплауз.

Тој не дочека да ја види оваа плоча, но постхумно би сакал да му ја доделам, за неговата колекција, на неговото семејство, поточно на Ели и Бане“.

Меѓу гостите на промоцијата беа и близначките Маријана и Росана, со кои Дац и Александар најавија заедничка песна, Блага Петреска со која неодамна снимија дует, а која ги пофали како врвни професионалци, но и Маја Гроздановска Панчева и Дарко Панчев.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело