Морничави факти за јапонската „шума за самоубиства“: Наоѓаат и по 100 тела годишно, некои веруваат дека е опседната

Покрај страшниот тренд на самоубиства, Јапонија има и традиција со ритуалистичко самоубиство

Во Јапонија самоубиството не се гледа со стигма како во повеќето земји во светот.

Впрочем, уште од феудалната ера на земјата постоело таканаречено самоубиство од чест – seppuku – кое го изведувале самураите.

Традицијата веќе не е норма, но кај дел од народот останало верувањето дека со самоубиството, некоја личност презема одговорност за своите грешки или својот неуспех.

Властите пробуваат да го намалат бројот на самоубиства во шумата

Во 2017 година, јапонските власти најавија дека ќе прават напор да го намалат бројот на самоубиства во наредните десет години.

Овој план вклучува и мерки поврзани со шумата, како поставување безбедносни камери и засилено обезбедување на шумата.

Низ шумата се поставени и пораки со цел да ги одвратат луѓето од намерата, заедно со контакт од места каде што можат да побараат професионална помош.

Некои веруваат дека шумата е опседната

Со толку многу трагедии во неа, очекувано е да се прослави верувањето дека шумата Аокигара е опседната.

Некои веруваат дека меѓу дрвјата уште „живеат“ душите на луѓето кои си го одзеле животот овде.

Според некои народни прикази, овие души се одмазднички настроени и ги вознемируваат посетителите на шумата.

Некои веруваат и дека овие души ги намамуваат луѓето да извршат самоубиство.

Секоја година се трага по мртви тела

Секоја година, полицајци и волонтери ја пребаруваат шумата за мртви тела, и тоа уште од 1970-тите.

Познато е дека во раните 2000-ти, секоја година овие патроли откривале и до 100 мртви тела.

Но, потоа јапонските власти одлучија да престанат да го споделуваат бројот на мртви тела, со цел да не охрабруваат други луѓе да се самоубијат во шумата, но и поради чувствителноста на информацијата.

Ако одите да кампувате, ќе ви дојде полиција

Кампувањето во шумата не е забрането. Но, полицајците кои се на терен секогаш тргаат со претпоставка дека камперите се дојдени за да си го одземат животот.

Наводно, некогаш луѓето престојувале по неколку денови во шумата за да размислат за својата одлука, пред да извршат самоубиство.

Па, кога полицајците ќе забележат шатор, разговараат со камперите и генерално пробуваат да ги натераат да ја напуштат шумата.

Шумата сепак е морничава

Аокигара е толку густа шума, што дури и искусните авантуристи си го одбележуваат патот кога се движат низ неа.

Покрај тоа, некои забележале дека имаат проблеми со телефонската мрежа и нивните GPS уреди кога се во шумата, што значи ако некој се изгуби, може да остане потполно сам, без можност да повика помош.

Се претпоставува дека причината за ова е почвата која е многу богата со железо.

Спирова С. | Црнобело