„Бев во Старата скопска чаршија, пиев турско кафе, јадев лахмаџун - таа е душата на Скопје“
Спонзорирано од:
Спонзорирано од ОгласиЗаРабота.мк
Менаџер 20-09-2021


„Бев во Старата скопска чаршија, пиев турско кафе, јадев лахмаџун - таа е душата на Скопје“

Скопската чаршија е место за сè, и за шетање, и за пазарење, танцување до раните утрински часови, час по историја и враќање назад во времето, за кафе со пријателите, за ручек со семејството, гордост наша пред странците… Таа била, е и ќе остане култно место во градот.

charshijata-e-dushata-na-skopje-a-od-kale-pogledot-e-najubav-01.jpg

Рано неделно утро… Топлото време сè уште царува, а јас полека шетам низ моето омилено место во градот - Старата скопска чаршија, тивко набљудувајќи како таа се буди. Малите тесни улички се празни, капаците на дуќаните затворени, излозите го немаат оној познат сјај, мирис на свежо сварено кафе и бурек… тука-таму по некоја чаша, оставена на прозорците како нем сведок од минатата бурна ноќ.

Гледам како се буди чаршијата. Толку е мирно, без познатиот метеж, само по некој стар мајстор, кој по навика, првото кафе го пие во дуќанот!

charshijata-e-dushata-na-skopje-a-od-kale-pogledot-e-najubav-09.jpg

Златен накит кој сјае, рачно изработени филиграни кој од кој поубав, стариот саатчија и шармантниот шапкар со најубавите шешири, дуќанот за антиквитети каде чиниш времето застанало, кожените чанти во сите бои, шарените ќилими и старите јамболии, убавите магнети со мотиви од градот, природните крзна и многу, многу стари значки, големи, мали, сребрени и златни, комунистички со црвени ѕвезди.

Мал шарен свет кој во кој тешко е да се одлее на дуќанџиите кои срдечно поздравуваат. Бујрум, повели и по некој руски или англиски збор за странците.

charshijata-e-dushata-na-skopje-a-od-kale-pogledot-e-najubav-05.jpg

Но, во ова неделно утро е празно. Ме мами само аромата на турскиот чај и кафето, а јас седнувам во едно од многуте кафулиња.

Послужено во мала шолјичка со бакарни украси, со мерак и мало локумче. Прво со очи се насладуваш, а потоа со душа! Го сакам сиот тој хаос на скопската чаршија среде пазарен ден, ама ја сакам и таа тивка доба, како затишје пред бура.

Лавиринт од дуќани и заборавени занаети

Обожавам да талкам низ тој лавиринт од мали дуќанчиња, стари занаетчилници, тесната калдрма, чајџилници и бурекчилници, цркви, џамии, музеи, амами, и секако Безистенот.

Чаршијата тврдоглаво ѝ пркоси на урбанизацијата и модерното време, и гордо стои, иако понекогаш се бори со времето и штетата, но силно се држи за и на идните генерации да им ги покажи сите белези од минатото, микс на култури и религии, кујни и вкусови.

charshijata-e-dushata-na-skopje-a-od-kale-pogledot-e-najubav-04.jpg

Убавината на чаршијата и ја даваат Даут-пашиниот амам, кој сега е уметничка галерија, некогашното преноќилиште за трговци Капан ан кое денес е култно место за забави, и Сули ан кој е дом на Музејот на старата Скопска Чаршија, а каде порано, се снимаа легендарните Македонски народни приказни.

Но, срцето на чаршијата е Безистенот, од каде и таа се раѓа, некогаш збирно место на трговци од сите краишта на Македонија и подалеку, а денес збир на неодоливи кафулиња со најдобриот чај. А гордоста на чаршијата е Куршумли ан, стара моќна градба кој некогаш бил дом на големите турски сараи.

charshijata-e-dushata-na-skopje-a-od-kale-pogledot-e-najubav-02.jpg

Продолжува на следната страна...



Би можело да ве интересира:

Низ фотки: 20 причини да го посетите Златибор во зима Златибор важи за едно од најбајковитите места во Србија, кое има многу што да по...
Порано биле канибали, денес не смеете да носите очила и шапки: 11 факти за животот на Фиџи Членовите на владата на Фиџи за некои официјални приеми облекуваат здолништа, а ...
35 патувања кои треба да ги остварите со својот партнер во текот на животот Нема појасен индикатор за квалитетот на врската од заедничко патување со партнер...

Најчитани неделава

sonovnik-sidebar.jpg