Како да внесете повеќе природни пробиотици во вашата исхрана?

Без разлика дали доаѓаат во течна или поцврста состојба, пробиотиците се нераскинлив дел од пирамидата на здравата исхрана, и доколку сакате да го зајакнете имунитетот, но и поради други бројни здравствени бенефити, пожелно е да вклучите неколку во вашето дневно мени.

Етикетирани уште како „добри бактерии“, пробиотиците побрзо ја разградуваат храната во цревата, обезбедуваат енергија за телото и се одличен сојузник во борбата против инфекции.

Ова се 4 начини како да ги вметнете во вашата хранлива рутина на природен начин, без да земате додатни вештачки создадени суплементи.

Комбуха

Јапонската чајна габа е главниот „виновник“ за создавање на овој магичен напиток кој лекува многубројни болести. Списокот со позитивните влијанија на комбухата е бесконечен – од чистење на крвни садови, регенерација на клеточни мембрани, делотворна против замор, зглобен ревматизам, природен зајакнувач на мускулите, до лекување нервоза и несоница.

Комбухата исто така го забавува процесот на стареењето и ги „пегла“ брчките на лицето. Особено е добра за црниот дроб и неговото непречено функционирање, а ги омекнува, чисти и помага во исфрлање на жолчните камења.

Позитивно влијае врз намалување на телесната тежина, ја олеснува менопаузата, но и ја засилува потенцијата.

Со еден збор, овој течен пробиотик е лек за сè.

Кисела зелка

Скоро и не постои домаќинство кое не може да се пофали со буре кисела зелка во зимскиот период, а доколку не сте мајстор за правење на овој ефикасен пробиток, едноставно може да си ја купите, бидејќи е евтина и лесно достапна.

Препорачлива и за вегетаријанци, преку процесот на ферментација, киселата зелка крие богатство од витамин Ц и дел од спектарот на Б витаминот, односно Б3, Б6 и Б12.

Особено делотворна е течноста во која зелката се скиселува, народски позната како расолница.

Киселата зелка во комбинација со расолницата, активно го обновуваат сврзното ткиво на мускулите и ги зајакнуваат коските. Ги намалуваат отоците на телото и ги регулираат лошиот холестерол во крвта. Ќе го зајакнете имунитетот, и подобро ќе се справувате со стресот.

Поголем дел од луѓето се колнат дека не постои подобар лек за мамурлак од чаша добра расолница.

Мисо

Пастата која се добива од ферментирани соја зрна во комбинација со сол и габата во Јапонија позната како kōji е неизоставен дел од секоја мисо супа, еден од омилените оброци за добро утро на жителите во оваа земја.

Бидејќи изобилува со витамини и минерали, Јапонците тврдат дека мисо супата ја одржува еластичноста на кожата, ги подмладува и ги одржува витални и здрави.

Слично како и останатите пробиотици, мисото го зголемува имунитетот и се грижи за цврсти коски, а дел од истражувањата покажале дека значително го намалува ризикот од заболување од рак на дојка и воедно штити од радијација.

 

Кефир

Кефирот е освежителен пробиотски пијалак кој се добива од ферментација на кравјо, овчо или козјо млеко, со помош на кефирна габа. Важно е да се напомене дека предноста секогаш треба да му ја дадете на свежиот и домашно подготвен кефир, отколку на индустрискиот, бидејќи вкусот можеби им е сличен, но квалитетот не е ниту приближно ист.

Киселкаво-освежувачкиот вкус, фактот дека не дебелее, ја подобрува циркулацијата и го чисти организмот од насобраните токсини, се само неколку од причините поради кои ќе го засакате овој млечен напиток. Содржи дури 3 пати повеќе видови на полезни микроорганизми од обичниот јогурт.

Воедно, кефирот е природен антибиотик кој ги ублажува воспаленијата во организмот, ги лечи бубрезите и е одличен сојузник во борбата против упорната кандида.

(О) Милена | Црнобело