Гордана Деан Поп Христова за животот во Еквадор: „Еквадорците крај брегот уживаат во лулашки и ќе ви го поправат интернетот по 5 дена“

Какви се локалците? Каков дух имаат, какви навики во секојдневието?

Има голема разлика помеѓу Еквадорците од градовите и тие што живеат на крајбрежјето или во Амазон.

Во градовите како Кито, Куенка и архитектурата е поинаква, колонијална, потсетува на Европа, Шпанија, луѓето се многу културни, има театри, филхармонии, уметнички академии, еден цивилизиран живот.

На крајбрежјето луѓето се поинакви, куќите се малечки, трошни, од цемент без фасада, луѓето се опуштени, не сакаат многу да работат и ќе видите многу Аргентинци кои доаѓаат тука на печалба и работат во сите туристички објекти, додека Еквадорците лежат во лулашки во ладовина.

Семејствата на крајбрежјето се многубројни. На пример нашите први соседи во Олон имаат 16 членови на семејството. Убаво е што многу се почитуваат и владее хармонија. Мајката, односно бабата е глава на семејството, таа го распоредува буџетот и одлучува за сѐ. Инаку имаат култ кон мајките, многу ги почитуваат.

Каков е стандардот на живот? Високи ли си месечните трошоци за сметки?

Кога дојдовме имав чувство дека живеат како ние порано во Југославија. Има некоја социјална правда, минимална плата од 380$, а трошоци за сметки се 100$ со интернет, струја, вода, гас е на пример 1$ месечно, бензин е 2$ за четири литри.

Некои професии се добро платени, на пример доктор во државна болница има плата околу 2.500$ а во приватните 5.000$. Полицаец има почетна плата од 800$, службениците во банките и во државните фирми имаат околу 600$ месечно. Сѐ на сѐ животниот стандард не е лош тука.

Има ли добра инфраструктура, модерни објекти?

Во градовите како Кито, Гвајакил има модерни објекти, стакло, бетон, високи згради, огромни шопинг молови, цела земја е поврзана со автопатишта, аеродроми и големите автобуски постројки се многу модерни, чисти со ресторани, продавници, хипермаркети.

Во Куенка, центарот на градот е цел во колонијален стил, тоа е град со најсочувана колонијална архитектура во цела Јужна Америка. Останати делови на градот се модерни со прекрасни куќи и практично нема сиромаштија. Во Гвајакил, за разлика од Куенка, има делови со многу сиромашно население и криминал.

Има ли многу туристи? Што нуди оваа земја како туристичка дестинација?

Во Еквадор има многу странци кои живеат и работат, како и пензионирани „Грингоси“, но исто така имаше и многу туристи од целиот свет.

Во хостелот кој го води ќерка ми Јоана секогаш имаше туристи, најчесто се тоа занимливи луѓе кои патуваат со месеци по Јужна Америка, прекрасни пријателства имаме создадено за овие години.

Продолжува на следната страна...