Ангела Трајкоска: „Во Кападокија турски чај е 30 денари, а летот со балон е незаборавно искуство“

Какви се цените?

Цените се прифатливи и не се превисоки за туристичко место. Има локали за традиционална храна која е со релативно поевтини цени, но може да се најдат и поелитни ресторани со полуксузен начин на служење на храна.

Турскиот чај е со ниска цена и истиот чини 5 лири или 30 денари. Претходно го имавме пробано типичниот турски чај, но во работилницата за рачна изработка на предмети од керамика бевме послужени со топол чај од јаболко којшто мора да се проба.

Зошто Кападокија е уникатно доживување?

Кападокија е спој на модерна туристичка атракција со балони и мистична приказна за уникатните градби и пештери и која раскажува за настани кои се клучни за христијанството.

Зелената и црвената тура се препорачливи за да се доживее и истражи во целост Кападокија. Тоа се целодневни екскурзии во кои ги посетивме: Музејот на отворено Ѓореме во кој се сместени седум христијански цркви во карпи, прекрасни видиковци на долините, фасцинантниот подземен град Кајмакли којшто се протега осум нивоа под земја и чии тунели откриваат историски винарии, кујни и соби за дневен престој користени уште од седми век пред нашата ера, куќи во облик на печурки во долината Пашабег, двочасовна тура со јавање на коњи и се разбира кревањето на стотици балони во воздух на изгрејсонце.

Има ли рестрикции таму поради пандемијата? Се носат ли маски?

Бидејќи е туристичко место, па скоро и да не заприметивме дека патуваме за време на пандемија. Маски носевме само на аеродромите и за време на летот од Скопје до Кајсери.

Колку дена се доволни за убаво да се доживее Кападокија?

Четири до шест дена се сосема доволно за целосно доживување на Кападокија.

Доловни ни ја атмосферата од пештерските хотели…

Престојот во CAVE хотел е задолжителен за комплетно патување низ времето и доживување на животот на луѓето кои во минатото живееле во Кападокија.

Сепак, во денешно време хотелите се современо уредени, но со задржување на автентичноста на пештерите и внимавање на деталите за доживување на атмосферата и традицијата.

Продолжува на следната страна...