Ана од Скопје: „Неколкупати бев одбивана на интервјуата, но кога успеав и станав стјуардеса - животот ми се промени“

Како ги поднесуваш временските и температурните разлики?

На почетокот ми беше многу тешко да можам секој ден да се адаптирам на нова сезона низ светот, но подоцна се навикнав.

Исто така во летните месеци во УАЕ е многу топло, така што се обидов да аплицирам за одмор во тие месеци и да го поминам некаде низ Азија.

Колку земји имаш посетено досега?

Имам посетено 5 континенти и 50 држави.

Држава во која со задоволство се враќаш одново и одново е…

Имам неколку држави во кои би се враќала ако можам и секоја година барем еднаш. Тоа се Тајланд, Индонезија, Индија, Шри Ланка и Сингапур.

Држава која не би сакал да ја посетиш никогаш повеќе е…

Дефинитивно Бангладеш! Тоа беше мојот прв лејовер што го имав и нема никогаш да заборавам колку беше преголем хаос и константна врева насекаде.

Како изгледа животот во Нигерија? Зошто не ти се допадна таму?

Нигерија беше нешто што никогаш не очекував дека ќе се случи. Со оглед на тоа дека е една од земјите во Африка со многу сиромашно население, на почетокот бев во шок од глетката, но подоцна се обидов да го прифатам тоа дека не секаде светот е розов и дека можам да најдам начин со мали обиди барем на дел од луѓето околу мене да донесам насмевка.

Изненадувачки е колку интелигентни луѓе запознав, но и тажно што животот никогаш не им пружил шанса да се школуваат и да ја развијат таа интелигенција.

Нигерија како држава важи како една од најопасните, каде што секојдневно голем број луѓе се киднапирани и исчезнуваат. Периодот додека бев таму, покрај обврските со работа, слободното време го користев во посетување на сиропиталишта каде што поминував време со децата, учејќи ги англиски или готвење храна за нив.

Еден ден успеав и да им организирам посета на авионот бидејќи беа многу возбудени да видат како изгледа.

По речиси една година помината таму, се одлучив дека сепак Дубаи е мојот дом, и би сакала да се вратам назад. Најмногу поради тоа што Нигерија не е безбедна земја за нормален живот, а исто така и дека многу секојдневни работи за живот не се достапни таму.

Тоа беше прекрасно искуство и научив многу за животот таму и нивната култура, но време беше да се вратам каде приказната започна и да продолжам да ја градам со нови искуства.

Живееш во Дубаи, долови ни го секојдневието таму…

Неодамна се преселив во нов стан со голема градина и поглед кон базенот. Па, така денот ми започнува со утринско кафе во градината со мојата мачка Лео, потоа утринско пливање во базенот и правец на работа во бутикот.

Слободните денови ги поминувам со пријателите на авантури во пустина или вечери и ручеци во некој од рестораните или плажите.

На оние кои сакаат небото да им биде „канцеларија“, но немаат храброст, што би им порачала?

Секојдневно се соочувам со истото прашање и одговорот е ист секогаш, дефинитивно мора да се проба, бидејќи според мене е едно од најдобрите искуства во мојот живот, и одлуката да станам стјуардеса не би ја сменила никогаш во ниедна ситуација.

Повеќе фотографии на следната страна...