Ана од Скопје: „На 20 години го имав првиот сериозен симптом на мултипла склероза, син ми ми е злато - ми помага во сè“

Влијаат ли стресните настани на појава на одредени симптоми? Си имала ли таква ситуација?

Ух, кој немал таква ситуација, па јас да бидам заштитена и имуна на стрес. А стресот е апсолутно непријател на МС и влијае на појавата на релапси на болеста, на потенцирање на симптомите и влошување на нашата кревка здравствена состојба.

Каква терапија практикуваш?

Примам високоефикасна терапија наменета за лица со високоактивна МС, препишана од невролог.

Секако, тука се вклучени витамини, суплементи, здрава исхрана, култура на живот, физичка активност во рамки на моите можности. Секое лице со МС треба да си го пронајде начинот на живот кој најпозитивно му делува и одговара.

Те плаши ли помислата на иднината? Успеваш ли да се концентрираш на мигот и да уживаш во сегашноста, нешто што секој еден од нас треба да знае да го прави?

Никој не може да знае што го чека утре, затоа едноставно најдете ја среќата во сегашноста, едноставноста и малите моменти, тие го чинат животот убав.

Има една мудра мисла: Животот е она што ти се случува, додека правиш планови за иднината. Едноставно не грижете се и не правете планови за иднината, го пропуштате најдоброто – сегашноста.

Колку текот на оваа болест е индивидуален?

За мултипла склерозата единствена предвидлива работа е нејзината непредвидливост.

Ја нарекуваат болест со 1.000 лица бидејќи нема 2 лица со МС со исти симптоми, развој и прогноза на болеста.

Ова е болест - снегулка бидејќи секоја снегулка е различна, болест како отпечаток од прст.

Како што спомнав, во Македонија со МС живеат повеќе од 1.500 лица, 3 пати почесто се дијагностицира кај жени, отколку кај мажи.

Се дијагностицира во најпродуктивните години од животот, од 20 до 40, и е честа причина за инвалидитет кај младата работоспособна популација.

За жал, старосната граница на дијагностицирање на МС се спушта, а за жал најмладиот пациент е на 12-годишна возраст.

За МС нема лек, но има третмански опции кои помагаат да се спречи прогресијата на болеста и да се превенира настапувањето на инвалидитет.

Кај нас, на Клиниката за неврологија, достапни се 10 различни лекови за МС, кои се даваат во зависност од развојот и природата на самата МС. Како здружение се бориме за достапност до високоактивни лекови, бидејќи се соочуваме со проблем на недостапност на истите, а знаеме дека во моментот 60 лица со МС се на листата на чекање за примање на оваа терапија.

Да се навратам на прашањето, може да се потрудиме да превенираме со здрави навики, храна, сон, физичка активност, но, сепак не претставува целосна гаранција дека можеме да ги контролираме симптомите.

Да не обесхрабрувам сепак, порака за лицата со МС: „Држете се до културата на живот, здравиот начин на функционирање, сепак позитивно влијае и на здрав човек, а посебно на лица со хронична болест. Не обесхрабрувајте се, ништо не е изгубено, прилагодете си го животот на сопствените потреби и живејте среќен и исполнет живот“.

Актерката Селма Блер отворено говори за соочувањето со оваа болест...Колку сметаш дека говорењето на темата јавно помага?

Апсолутно помага, во последно време лицата со МС почнуваат да се охрабруваат и да говорат јавно за својата состојба.

Лична сатисфакција е кога ќе дознаеш дека си охрабрил или инспирирал друго лице со хронична болест, едноставно има многу лица кои се соочуваат со МС, помага да се споделат предизвиците, искуствата добри и лоши, да сфатат дека не се сами, дека не има над 1.500 лица во Македонија.

Што би им порачала на другите што се соочуваат со оваа дијагноза?

Тука ќе бидам кратка: „Не стремете се кон живот исполнет со години, туку кон години исполнети со живот“.

©CRNOBELO.com Забрането преземање и копирање. Крадењето на авторски текстови е казниво со закон.

Симона Симионова | Црнобело