Илија Каниковски, стјуард во Wizz Air: „Ова не е само женска професија, досега сум посетил 40 земји на 3 континенти“

Детали

петок, 08 декември 2023

„Иако постојат стереотипи дека ова е женска професија, многу патници позитивно реагираат кога на еден лет е присутен само машки кабински екипаж. Оваа професија станува сè популарна меѓу мажите последниве неколку години, особено на нашите простори, а разлика со жените речиси и да не постои“, вели Илија Каниковски, кој работи како стјуард и е заштитно лице на Wizz Air за Македонија.

Илија Каниковски (30) од Скопје повеќе од 4 години работи како стјуард во авиокомпанијата Wizz Air.

Овој дипломиран економист, во еден момент посакал да ја смени работата со нешто позабавно и повозбудливо, а да се разликува од она што го работел претходно.

Се пријавил на оглас во авиокомпанијата каде што денес е и заштитно лице за Македонија.

Во овие години тој посетил околу 40 земји и вели дека работата му дава можност за посета на многу други држави и градови, а тоа е и една од најголемите предности на оваа професија.

За своето искуство, како се справува со нервозни патници и со оние кои се плашат од летање и како реагира на коментарите дека ова е „женска професија“, Илија ни раскажа во разговорот за CRNOBELO.com:

Колку време си стјуард и која е најдобрата, а која е најлошата страна да се биде дел од оваа професија?

Со оваа професија се занимавам четири и пол години.

Предностите на оваа работа се запознавањето многу луѓе, можностите за патување, тоа што е динамична работа, каде секој ден е различен од претходниот.

Не е вообичаена работа со фиксно работно време, се работи за викенди и празници, во раните утрински и доцните вечерни часови кога има и најмногу летови, меѓутоа со добар план и организација, предностите преовладуваат.

Што те привлече најмногу кон оваа професија?

Работата како стјуард излезе сосема случајно.

Ми требаше промена од претходните работни искуства, нешто ново, поразлично, несекојдневно, возбудливо.

Си летал ли често со авион пред да решиш да аплицираш за стјуард?

Да, многу често. И речиси на секое патување со авион си замислував дека можеби треба да пробам и јас да ја работам таа работа и да бидам дел од авијацијата.

Како изгледаше твоето интервју за работа? Какви критериуми требаше да исполниш?

Искрено, тоа беше како и секое мое претходно интервју за работа.

Покрај физичкиот изглед, значителна улога имаат и познавањето странски јазици, комуникациските вештини и желбата за работа со луѓе.

Како стана заштитно лице на Македонија за Wizz Air?

Компанијата си одбира претставник кој ќе биде заштитно лице во секоја држава каде што има база.

Тоа подразбира сликање за медиуми, рекламни кампањи, отворање нови линии, присуство на настани како што е Wizz маратонот и постојано рекламирање на брендот и компанијата.

Постои ли дискриминација, со оглед на тоа што си машко? Колку се мажите застапени во оваа професија и дали се жените попривилегирани или нема разлика?

Не, напротив. Иако постојат стереотипи дека ова е женска професија, многу од патниците позитивно реагираат кога на еден лет е присутен само машки кабински екипаж.

Може да се каже дека оваа професија станува сè популарна за мажите во последниве неколку години, особено на нашите простори.

Застапеноста на мажите е сè поголема, а разлика со жените речиси и да не постои.

Најубавата работа која ти се случила за време на некое патување е…

Од секое патување се враќам со многу нови искуства и спомени.

Како најубави и највозбудливи искуства можам да ги издвојам спуштањето со падобран и погледот од Бурџ Халифа.

А, која е најнепријатната работа која ти се случила за време на некој лет?

Имавме принудно слетување заради влошена здравствена состојба на патник.

Кабинскиот екипаж е обучен за давање прва помош, но некогаш е неопходно лицето да го преземат здравствени работници.

Најважно е што се заврши во најдобар ред. Безбедноста на патниците е секогаш наш приоритет.

Како се справуваш со нападни, пијани, гласни патници или со патници кои се исплашени поради турбуленциите? Има ли често неубави ситуации?

Пробуваме да ги избегнеме тие ситуации преку „филтрирање“ на патниците при влегување во авионот и контролирано служење алкохол.

„Филтрирањето“ значи дека правиме дополнителна проверка на нивната моментална состојба, дали консумирале алкохол повеќе од дозволеното, за да избегнеме инциденти на подолги летови.

А, оние кои се исплашени ги смируваме со разговор, објаснување, поддршка и постојана грижа за нив, но и за останатите патници за време на летот.

Кои се најиритирачките работи кои ги прават патниците во авионите?

Непочитувањето на правилата и процедурите за време на летот, иако тие се претходно објаснети, а се создадени за нивна безбедност и удобност во патувањето.

Имате ли контакт со пилотите? Се однесуваат ли тие надмено поради својата работа?

Не, напротив, меѓусебната комуникација е клучен фактор за еден лет.

Во постојана комуникација сме за сите случувања во кабината, патниците, временските услови, предвиденото време на слетување и слично.

Која е најдалечната дестинација што си ја посетил? А, која е најубавата?

Најдалечната, а воедно и најубавата дестинација се Обединети Арапски Емирати.

Тоа е искуство кое треба да се доживее барем еднаш во животот.

Прекрасни плажи, градини, палати, стаклени облакодери и трговски центри.

Познат како еден од најпрогресивните региони во регионот на Блискиот Исток со најголема трансформација во изминатите години.

Како ги поднесуваш временските и температурни разлики на патувањата?

Најчесто летаме на дестинации со иста временска зона и минимални температурни разлики.

А кога патувам приватно, многу лесно се справувам со истите.

Колку држави си посетил досега?

Повеќе од 40 држави на 3 континети и целам кон тоа оваа бројка постојано да расте.

Во која земја/град се враќаш со задоволство, а каде не би сакал веќе никогаш да одиш?

Поради мојот авантуристички дух не постои место каде што не би се вратил.

Со добро друштво би се вратил повторно на која било веќе посетена дестинација.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело