Полина Тасева: „Во битолското кабаре се пронајдов себеси, секое излегување на сцената е нов предизвик“

Детали

понеделник, 07 октомври 2024

„На еден настап во кабарето снема струја и ние останавме во темница на сцената. Тогаш голем дел од публиката ги вклучи светлата од мобилните телефони и направија магична атмосфера“, вели за CRNOBELO.com Полина Тасева, пејачката која има и огромен талент за цртање.

Полина Тасева е магистриран оперски пејач, но долго време е присутна и во светот на поп музиката.

Таа е еден од членовите на битолското кабаре Gold Felicia, а во моментов работи и на многу нови проекти, меѓу кои и на песната што ќе ја испее на Макфест 2024 на крајот на октомври.

Иако денес музиката ѝ е и професија и голема љубов, Полина отсекогаш го сакала балетот, а играла и во детски театарски претстави.

Но, малкумина знаат дека таа има неверојатен талент за сликање и сака да црта, па во времето на пандемијата постојано беше со четките и боите во раце и создаваше мали уметнички дела.

За музичката кариера, актерството и балетот и по нешто малку за приватниот живот, Полина раскажа во интервјуто за CRNOBELO.com:

Веќе неколку години си дел од битолското кабаре Gold Felicia... Дали ти е сè уште ти е предизвик и адреналин секој викенд да излегуваш на сцената?

Веќе минува и третата година откако започна кабаретската приказна.

Тоа е сцена која секогаш носи нешто ново во моментот на изведбите, проследена со прекрасни танчери, интересни кореографии и богати костими.

И секогаш предизвик затоа што никогаш не знаеш што те очекува.

Секоја песна е соодветно избрана за изведувачот, за настапот да биде оригинален од сите аспекти.

Костимографијата е уште една перспектива која носи возбуда и прави да се чувствувам посебно кога ќе се појавам на сцената.

Секој костим што го носам е креиран и скроен само за мене и моите точки.

И да, секој викенд сè уште е возбудлив затоа што сум опкружена со луѓе кои ги почитувам, и работам работа која се нарекува - задоволство.

Кажи ми нешто повеќе за кабарето - аудициите, првиот настап, колку се сменија работите низ сезоните?

Целиот овој период вложувам во себе и целам да бидам беспрекорна на моите настапи.

Како од самиот почеток, така и сега ме водат адреналинот и слободата што ги чувствувам кога пеам.

Во кабарето им се дадоа шанси на најдобрите, и сè уште функционираат како такви сите што се таму - од пејачи до танчери. И токму тие го заслужуваат своето место таму.

Неодамна имаше аудиција за нови артисти, актери и пејачи кои со својот талент ја збогатија програмата.

Нормално е да има промени од почетокот до сега, но сето тоа води кон уште поуспешни шоуа.

Најважно е екипата да функционира и да се задржи квалитетот на целокупниот проект.

Се случуваат позитивни промени, а ние се градиме преку искуството кое не може да се наметне освен да се доживее.

Колку публиката може да те крене или спушти кога си на настап? Си имала ли непријатна случка додека си на сцената?

Публиката е дојдена за нас со позитивни очекувања, и со заедничка енергија придонесуваме да оствариме добра забава.

Тоа за нас е успех, предизвик и взаемно задоволство.

А за тоа дали публиката влијае врз мојот настап, би рекла ‘да’ бидејќи овациите се едни од клучните моменти што ми даваат поттик да бидам оригинална на сцената.

Непријатни ситуации не сум имала, а можам да издвојам една позитивна случка кога во локалот за кратко снема струја и ние останавме во темница на сцената.

Тогаш се создаде интересен момент кога голем дел од публиката ги вклучи светлата од мобилните телефони и направија магична атмосфера.

Во кабарето настапуваш со познати македонски музичари. Дали сте блиски и како изгледа кога сте зад сцената и се подготвувате?

Имам изградено пријателски однос со сите колеги, се поддржуваме и сакаме, работиме заедно и на приватна музика и меѓусебно си споделуваме идеи и совети.

Заедничкото време го поминуваме претежно низ смеа и позитивна енергија.

Дури и кога зад сцената се подготвуваме во брзање, позитивната енергија преовладува, а ние си помагаме меѓусебно.

Продолжува на следната страница...