Андријана Јовановска, наша новинарка: „10 причини зошто си ја обожавам професијата“

Детали

среда, 11 февруари 2026

„Во новинарството никогаш нема 2 исти работни дена. Кога ќе стигнам во канцеларија, никогаш не знам каде ќе ме одведе денот - дали на некој прес, на интервју, концерт, промоција… Дури и да сум цел ден пред компјутер денот е различен - не знам на кои теми ќе работам, со кого ќе се слушнам, за кого ќе пишувам, кому ќе му пратам прашања за интервју“, вели новинарката Андријана Јовановска (47) од Скопје.

Андријана Јовановска (47) од Скопје работи како новинар од свои 17 години и годинава ќе слави јубилеј 30 години кариера.

Таа почнала како средношколка во тинејџерското списание „ТАА“, на почетокот правела анкети на дадена тема со тинејџери, а по една година го имала првото интервју со Александар Митевски, кој пак, ја запознал со Дуле и Коки и така „тргнал возот“.

По дипломирањето на Економскиот факултет станала уредник на машкото лајфстајл списание „ТОЈ машки свет“, а по неколку години и на „ТАА“, па потоа имала работни искуства и во други медиуми.

Последните 3 години е дел од тимот на CRNOBELO.com (и незаменливо парче од сложувалката, ќе додадам јас).

Причините поради кои Андријана ја обожава својата професија:

Секој ден е нова авантура

Во забавното новинарство никогаш нема 2 исти работни дена.

Кога ќе стигнам во канцеларија, никогаш не знам каде ќе ме одведе денот - дали на некој прес, на интервју, концерт, промоција…

Дури и да сум цел ден пред компјутер денот е различен - не знам на кои теми ќе работам, со кого ќе се слушнам, за кого ќе пишувам, кому ќе му пратам прашања за интервју и сето тоа го прави секој нов ден - нова авантура.

Адреналинот го чувствувам и после 30 години

Не познавам многу луѓе кои и по 30 години во истата професија ги води адреналинот и возбудата. Мене и по толку многу време, новинарството никогаш не ми здодеа.

Се случува да станам од спиење и да сум насмеана затоа што знам дека денес имам закажано интервју со Здравко Чолиќ, на пример.

Здравко Чолиќ

Или да се радувам што почнувам со нов проект (со надеж дека ќе е успешен), дека ќе отидам на некое патување поврзано со работата од каде што ќе донесам некоја приказна различна од другите.

Адреналинот ме крева и кога знам дека имам ексклузивно интервју, необична приказна, кога некој што бега од медиумите ќе ми даде изјава…

Почитта што ја добивам

Дури и да звучи надмено и егоистично, јас навистина се гордеам со себе кога ќе сфатам дека сум оставила печат со тоа што го работам, кога колега ќе ми подели комплимент за напишан текст, за соговорник со кого сум имала интервју.

Среќна сум што во овие 30 години сум оставила образ, па слушам коментари од типот „На тебе не можам да ти речам не“ или „Прво на тебе ти се јавувам“, од луѓе со кои имам децениска професионална соработка.

Никогаш нема да заборавам дека Милчо Манчевски ми кажа дека интервјуто што го правевме во време на пандемијата, според него е едно од најдобрите 3 што ги дал некогаш. За мене, тоа е и повеќе од комплимент.

Милчо Манчевски

Професионални запознавања кои се претворија во најдобри пријателства

Кругот на моите најблиски пријатели во најголемиот дел се луѓе од медиумите и естрадата.

И не, не се дружиме поради заемна корист и само затоа што сакаме да бидеме видени еден со друг на настани или да објавуваме фотки дека „сме во битно друштво“.

Марина Стојановска

Со години во мојот круг најблиски луѓе (меѓу другите) се и поранешен естраден ПР, неколку пејачи, новинарка, ТВ и радио водители, снимател, дизајнерка - сите нив ги запознав преку работата, а се или беа дел од моето секојдневие кое вклучува заеднички патувања, одмори, преспивање по дома, седенки, дружби со многу смеа (и расправии).

 Даниел Данн

Спомени од едно поинакво естрадно време

Сите што се дел од оваа професија колку јас (или повеќе) ќе ви кажат дека 1990-тите и раните 2000-ти беа најубавото време за македонската музичка сцена.

Секој ден промоција на нова песна, на албум, на спот, дружење меѓу музичарите, многу музички емисии, топ листи, интервјуа, сликање за насловни страници, концерти…

Никола Угриновски - Угро

Златни времиња кога се појавија Тоше, Ерзана, Нови дечки, Магија, Угро, кога си „грмеа“ Каролина, Ребека, Врчак …

Кога секој втор хит го имаше во себе зборот „бејбе“ (колку само многу ме ужаснуваше тоа во песните), ама денес ми звучи симпатично кога ќе го слушнам во некој ретро хит.

„Нокаут“ 

Продолжува на следната страница...