Зои Блаж за растењето дете во Германија, без баби и дедовци: „Нема кој да ти каже ‘оди одмори, јас ќе средам’“

Детали

четврток, 12 февруари 2026

„Најтешко е чувството дека немаш „резерва“. Нема кој да го причува детето еден час за да здивнеш. Нема кој да ти каже „оди одмори, јас ќе средам“. Сè е на нас двајцата. Кога детето е болно, кога не спие ноќе, кога сме уморни – нема замена“, вели Зои Блаж за CRNOBELO.com. Таа е мајка на 8-месечната Мариа, а со сопругот ракометар од Словенија живеат во Германија.

Инфлуенсерката Зои Блаж, Зорица Матијашич од Скопје, доби ќерка со словенечкиот ракометар Тадеј, откако пред 7 години доктор ѝ кажал дека никогаш нема да може да стане мајка.

Таа се соочувала со хормонален дисбаланс, но по години работа со ендокринолог, нејзината состојба се стабилизирала и таа стана мајка на малата Мариа, која сега има 8 месеци.

Зои, поради професијата на сопругот, живее во Германија, каде тој игра за германски клуб, но вели дека иако премногу ужива во улогата на мајка, сепак е тешко чувањето на дете без помош од баби и дедовци.

Таа за CRNOBELO.com споделува детали од секојдневието: 

Кои се најголемите предизвици во растењето на дете без помош од баби и дедовци?

Најтешко е чувството дека немаш „резерва“. Нема кој да го причува детето еден час за да здивнеш. Нема кој да ти каже „оди одмори, јас ќе средам“.

Сè е на нас двајцата. Кога детето е болно, кога не спие ноќе, кога сме уморни – нема замена.

Понекогаш ми недостига таа блискост, советите, топлината од семејството.

Но, истовремено нè направи посилни и поблиски како мало семејство.

И, исто така, од една страна сум благодарна што сме сами и не се меша никој во нашите одлуки, воспитување и навики. 

Сè има и маана и своја добра страна. Но, сум и тажна што расне далеку од нив … Ама еден ден ќе сме сите повторно на куп, засега често одиме во Словенија и Македонија, а и тие доаѓаат кај нас.

Како ги делите со сопругот домашните обврски и грижата за детето?

Сфативме дека не постои „машка“ и „женска“ обврска – постои тим. Кој е послободен во моментот, тој реагира.

Претежно јас сум повеќе со Мариа, но има денови кога тој презема повеќе.

Комуникацијата ни е клучна. Заедно си ги поделуваме обврските, заедно чистиме, готвиме, средуваме по дома. 

Кога ќе кажам „уморна сум“, тоа не е слабост – туку сигнал дека ми треба поддршка. И верувајте ми тоа е клучот на здрав брак, почитување и слога.

Кои моменти од мајчинството ти носат најголема радост?

Малите, секојдневни работи. Кога ќе ме прегрне без причина, ќе ми се насмевне од срце, кога ќе каже нов збор, кога ќе ме побара мене за утеха.

Тоа чувство дека сум нејзиното сигурно место – тоа е нешто што не може да се опише. Тогаш целиот замор станува помал.

И мамички уживајте во секој миг со вашите малечки бидејќи толку бргу раснат што не можете ни да замислите, гушкајте се, сакајте се, сè друго ќе почека.

Продолжува на следната страница...