Ивана од Берово е мајка на 4 момчиња: „Моја желба беше јас да се грижам за нив, избегнуваме штетни состојки во сè“

Утрото и изгрејсонцето ми се резервирани за себе, за благодарност и мир, а подоцна со нивното будење почнуваат најразлични активности.

За движење и пакување до 4 деца, имаме автомобил со 7 седишта и кога одиме некаде надвор од дома на неколку дена, тоа најчесто е Берово. Имаме куќа и таму, па имам оставено за сите по нешто за да не треба многу пакување.

Во летните денови често кампуваме и сакаме да поминуваме време во природа. За тоа е потребно повеќе спремање и организирање, но времето поминато надвор, блиску природата е бесценето.

Сите што имаме деца знаеме дека најдобрите играчки се вода, песок и стапчиња.

Природниот начин на живеење и љубовта кон природата ми е во крвта.

Избегнуваме штетни состојки во сè, колку што можеме. Најчесто оброците ни се дома подготвени, се трудиме да имаме дома што помалку процесирана храна.

Медот ни е главно благо, но секако добиваат по некое чоколатце од гости или на гости, не сме толку строги во тој поглед, радост им е, но секако умерено.

За облека, задолжително избираме природни материјали.

Синтетичките освен што се вештачки создадени од нафтени деривати преку хемиски процеси, тие немаат добар проток на воздух и не дозволуваат на кожата да дише, па кожата станува добра почва за развој на бактерии и непријатни мириси.

Кожата е наш најголем орган, тоа што го ставаме на неа и со коешто доаѓа во допир го апсорбира и завршува во нашиот крвоток. Многу од комерцијалните производи содржат штетни хемикалии кои го загрозуваат целокупното наше здравје.

Со цел да се заштитам себе и семејството, долго истражував, се едуцирав и почнав да изработувам производи за нега и хигиена само од природни состојки.

Имаме прекрасен имот во планина, оставен од прадедовците. Дедо ми и баба ми таму живееја, одгледуваа различни животни и храна.

Многу сум благодарна на можноста што ја имав да растам во такво опкружување. И сега во лето одиме сите таму, помагаме околу чистење на имотот и околу засадите.

Нашите деца уште од мали се во контакт со Земјата, присутни и набљудуваат.

Породувањето е природен физиолошки процес кој само до пред 50-тина години се случувал дома, нашите баби раѓале дома, со или без присуство на некој, раѓале по повеќе деца.

Денес е медицински случај, и секој втор не е природен од различни причини. Постарите имале разни знаења, имало жени што знаеле ако бебето не е свртено со главчето кон каналот, да го свртат со помош на песна.

Зарем не е фасцинантно тоа? Каде ни се изгубиле овие знаења се прашувам.

Тажно е што еден толку величествен чин, се претвори во трауматично искуство за многу жени кои ја губат желбата за раѓање.

Два од моите породувања, првиот и третиот се во Берово, довербата во докторот и начинот што се практикува таму ми беа најблиску до чувството на дом.

Таму кога ќе се роди бебето не го делат од мајката во друга соба. Бидејќи е мал град и се знаеме меѓусебно, односот од медицинските лица е како со свој и со радост го пречекуваат новиот живот.

Тие два ми се полесни и подраги од оние два во болниците во Скопје, каде сè е непознато, болнички светла, сите наоколу со маки… тоа прави еден грч во телото голем колку планина, затоа и болките се посилни.

Поради намалена плодова вода, докторот во Берово не пораѓа ако бременоста не е уредна до крај, бидејќи нема опција за царски.

Сите четири ми се природно родени, иако докторите во Скопје ми предлагаа царски, јас цврсто стоев до ставот и желбата за природно.

Вербата во животот ме водеше, во силата, моќта и мудроста што ја поседува женското тело. Кога силно веруваш знаеш дека сè ќе биде добро.

Сега кога имаме четири, си викам: колку би бил попразен животот ако не било тука и трето и четврто, колку би пропуштиле да не ги запознаеме тие убави души.

Децата се најубавото и највредно нешто што можеме да си го подариме. Ако нашите прабаби и баби не раѓале по повеќе деца, можеби и ние не би имале можност да го живееме овој земски живот“.

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело