Јана Гигова, уличен музичар: „Повеќе сакам да пеам за случајни минувачи, и во Македонија оставаат добар бакшиш“

Мака ли ти е да ја носиш постојано опремата со тебе, да влечеш звучници, микрофони, инструменти?

Не ми е. Го чувам звучникот блиску до местото каде што настапувам и го носам пеш. Порано носев звучници во количка ама ми ја украдоа заедно со звучникот по десетти пат.

Ти помага некој или сè правиш сама?

Отсекогаш сè сум правела сама. Не ми пречи некој да ми помага, ама баш и немам време да викам другари за да однесеме еден звучник. Додека да дојдат, 20 пати ќе го однесам и вратам.

Кога почнував да свирам вака, со другар изнајмувавме по пола огромни звучници и опрема, која, еден период ја туркав во количка од супермаркет од Карпош 4 до Центар, најчесто возејќи ролерки.

Многу ми беше интересно, се чувствував ко да сум во некоја игричка.

Се живее ли од пеење на отворено?

Да, иако сите луѓе на прв поглед имаат различен впечаток. Мислам дека дури и оние изведувачи кои не поминале дента најдобро, пак живеат многу подобро од некој кој има регуларна работа. Кај секој настапувач варира заработката.

Јас можам да зборувам само за мене, а и многу често живеам само од пеење надвор. Работам и други работи, држам часови, на пример, само кога не ми работи гласот.

Пееш само низ Македонија или и во странство?

Пеам сегде. Сум била на неколку континенти благодарение на пеењето. Почнав со ангажмани како музичар во хотели и локали низ Европа, а понатаму се заинтересирав за уличните настапи надвор од Македонија.

Во 2013-та имав за цел да докажам дека не ти требаат пари за да можеш да патуваш низ светот, па со автостоп и пеење надвор поминав преку 20 држави.

Користев и алтернативни начини на сместување кои се фокусираат на тоа да му пркосат на консумеризмот.

Тоа се групи и сајтови во кои луѓето низ целиот свет си доаѓаат на гости едни кај други, без надомест, туку за да се запознаат со различните култури и традиции.

Бидејќи сум сама девојка која патува, решив да се поврзам со онлајн група која вклучува само девојки од целиот свет, направена за да се избегнат лоши искуства на девојки кои патуваат сами.

Вака патував уште неколку години, а потоа се преселив на Крит, одвреме-навреме враќајќи се до Скопје или застанувајќи на некоја недела да свирам во Солун.

Кога последен пат си пеела во Скопје?

Пеев пред некој ден на плоштад. Всушност, периодов излегувам да пеам повеќе и поради луѓето кои ме прашуваат кога да дојдат да ме слушаат, па правам фиксни термини за да не одат до таму напразно.

Многу од луѓето кои поминуваат, доаѓаат за да ме чујат и да ме испочитуваат бар на кратко. Некои доаѓаат баш како да дошле на концертче, си седат со друштво, со кафе или пиво.

Многу пријателства имам направено од случајни минувачи кои застанале да ми направат муабет, а потоа се претвориле во долгогодишни другарства.

Ова е интересен и непредвидлив начин на живот и социјализација.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело