Спектакуларно запросување на Македонка во Истанбул - на јахта, со огномет и дијамантски прстен (фото)

Детали

вторник, 03 октомври 2023

Петар од Прилеп ѝ приреди магично запросување на неговата сакана Јована од Свети Николе, на денот на нивната годишнина на јахта во Истанбул. Во изјава за CRNOBELO.com, Јована не ги крие емоциите и вели дека е пресреќна што нејзиниот свршеник го испланирал магичниот миг до детаљ.

Петар (31) од Прилеп и Јована (25) од Свети Николе веќе 10 години се во врска, а 3 години заедно водат приватен бизнис.

Јована во голем дел од времето е посветена на нејзиниот Инстаграм профил и објавува најразлични содржини, а неодамна се пофали и со магичното запросување што ѝ го приредил свршеникот.

„Запросувањето се случи на јахта во Истанбул, баш на денот на нашата годишнина, 30-ти септември.

Тогаш ми кажа дека ќе ме однесе во некој ресторан што се наоѓа од другата страна во азискиот дел на Истанбул, по тој повод да прославиме и дека јахтата само ќе нѐ однесе дотаму“ – раскажува за CRNOBELO.com, Јована.

Таа вели дека целиот настан бил испланиран до детаљ.

„Веќе кога влеговме во јахтата имаше организирано вечера со свеќи и тивка музика, па за момент насетив дека ќе се случи такво нешто.

Ми подари букет црвени рози, кутија со балони и честитки со пораки за годишнината.

Така додека се возевме, на мостот на Босфор го прочитав моето име, и веднаш потоа и реченицата „Will you marry me?“, во тој момент и ме праша дали сакам да се омажам за него. Кога одговорив „Да“ , следуваше и огномет.

Најголем впечаток секогаш ми остава кога сѐ е испланирано до детаљ, се запознавме на гондола која наликува на брод во луна парк, а запросувањето симболично се случи на јахта.

Исто така, ми остави впечаток со тоа што годишнината и запросувањето се на ист датум и можеби како најважно, дека се случи во еден од омилените градови што сакав да ги посетам.

Голем впечаток ми остави и уникатноста на самиот прстен. Одлично ме познава и знае дека сакам кога работите имаат и пренесуваат некаква порака“ – вели таа.

Јована открива дека воопшто не ни насетувала дека Петар планира запросување, затоа што вешто успеал да ги скрие сопствените намери, сѐ до последниот момент.

„Ние се договоривме да одиме неколку дена во Грција, Турција и Истанбул воопшто не беа во план, веќе резервиравме во Грција за два дена по нашата годишнина.

Ме извести ден пред да заминеме дека сака да ме однесе за годишнината на место што јас отсекогаш сум сакала да го посетам.

Сѐ додека не стигнавме на границата Грција - Турција, јас бев убедена дека ќе бидеме уште два дена во Грција само на друго место“ – вели таа.

Инаку, Петар за разлика од голем број други мажи што мака мачат за тоа како да го сокријат прстенот додека се на патување, имал малку поинакви планови.

„Претпоставив дека сака да ме запроси, но не бев сигурна сѐ до моментот кога ми рече дека ќе отиде до автомобилот бидејќи заборавил нешто, а „магично“ исчезна на час и пол.

Всушност тогаш заминал за да го купи прстенот. Прстенот го купил од Истанбул, бидејќи само таму и бил достапен тој модел.

Па, голем удел имало и тоа во одредување на местото за запросувањето. Така што немало никаква можност за да го видам“ – открива таа.

Погледнете уште неколку фотографии од Јована и Петар на следната страница...