Денес се празнува Св. Антониј, светецот кој штити од лудило и ѓаволот

Детали

петок, 30 јануари 2026

Денес, 30 јануари во православието се слави Св. Антониј Велики, светецот за кој се вели дека е заштитник од ѓаволот и лудилото. На овој ден именден празнуваат Антон, Антоние, Андон, Антоанета, Антонио, Доне, Дончо, Донка, Тони...

Свети Антониј е роден 251 година во село Кома, Египет.

Потекнува од благородничко семејство, а по смртта на неговите богати родители, кога имал само 20 години, решил да го подели наследството со својата малолетна сестра, ја згрижил кај нивни роднини, а својот дел од имотот  им го дал на сиромашните.

Се вели дека тоа го направил откако еден ден во црква ги слушнал зборовите: „Ако сакаш да бидеш совршен, оди продај го имотот и раздај го на сиромасите и ќе имаш ризница на небото, па дојди и врви по мене“.

Во текот на својот долг живот, направил многу подвизи, а особено се истакнал во борбата против еретиците.

По молба на Св. Атанасиј, ја посетил Александрија за да помогне во борбата против еретиците на Ариј кои биле силни.

Неговото пристигнување во главниот град предизвикало големо внимание. Многу пагани дошле да го видат, а многумина сакале и да го допрат поради неговата слава.

Се вели дека токму тогаш и поради него многу пагани го прифатиле христијанството.

Иако не знаел грчки, ни латински, туку само египетски, водел кореспонденција со Св. Константин Велики и го бранел Св. Атанасиј Велики од клеветите на непријателите.

Бил строг и кон неправедните судии и им го споменувал Страшниот суд, како и нивната должност да бидат милостиви и справедливи.

Се вели дека тој ги штити луѓето од ѓаволот и лудилото.

Тој бил воспитувач на воспитувачите и учител на учителите - цели 85 години се преобразувал себеси за да може да ги преобразува и другите.

Доживеал длабока старост - починал на 105 години.

Кога го почувствувал својот крај, на двајцата негови ученици им оставил завет да го погребаат тајно за луѓето да не го знаат местото на неговиот гроб.

Починал на 17 јануари 356 година.

На овој ден именден празнуваат Антон, Антоние, Андон, Антоанета, Антонио, Доне, Дончо, Донка, Тони...

А. Ј. | Црнобело