Сестрата на Спире кој почина во Кочани, пушти 27 балони кон небото за неговиот роденден: „Те сакам бато“

Детали

четврток, 13 ноември 2025

„Среќен небесен роденден брат. Оваа година можам да ти подарам само 27 балони“, напиша Ана, сестрата на Спире кој го изгуби животот во пожарот во Кочани, и објави емотивно видео на Инстаграм Стори.

Пожарот во дискотеката „Пулс“ во Кочани одзеде 63 животи и зави многу семејства во црно. Сите тие на свој начин се справуваат со болката, со траумата на тоа што го дознаа на кобниот 16-ти март.

И секој од нив на различен начин им оддава почит на своите загинати чеда, брат или сестра... А зборовите и фотографиите што ги објавуваат болат до срж.

И не ги болат само најблиските, туку сите во Македонија, кои сочувствуваат со нивната тага и загуба.

Една таква порака, која ќе остане длабоко врежана во колективната меморија, испрати и Ана Стоименова, сестрата на Спире Стоименов, кој загина во пожарот во Кочани на 26 години.

Спире на 12.11 требаше да полни 27 години, но не го дочека својот роденден.

А Ана, со многу болка, му испрати подарок кон небото - 27 сини балони, 26 за секоја година од неговиот живот, но и еден за роденденот што не го дочека.

Таа на своето Инстаграм Стори објави емотивно видео - застаната сама на зајдисонце, ги пушта балоните да летнат кон небото.

„Среќен небесен роденден брат. Оваа година можам да ти подарам само 27 балони“, стои во описот на видеото.

Таа сподели и фотка на Инстаграм со брат ѝ, па напиша:

„Светот мој минус тебе во него она што ќе остане, МАЛКУ Е! Свети денеска како што светеше и тука, твој ден е. Роденден. Те сакам, бато!“

Ана не го заборава својот брат, па за да одбележи 6 месеци од неговото заминување од овој свет, таа објави заедничка фотка со него и поезија.

Цветот е тајна на Господ - нежна убавина во кревко стебло.
Го држат корените, му даваат потпора и сила да стои исправен.

Но, секое цветче има жед. Без вода венее, без неа се суши и се гаси.
А кога ќе ја најде својата вода тој цвета, блеска, живее.

Јас сум тој цвет.
Корењата што ме хранат и ме чуваат се мама и тато.

А водата што ме разубавуваше, што ми беше живот и светлина, беше Бато.

Сега таа вода ја нема, ми ја земаа.
Сега цветот (јас) остана полусушен – со корени што се борат да го одржат жив“, напиша Ана.

За потсетување, на 15 ноември (сабота) во 12:05 ќе се одржи Марш за ангелите, а родителите и роднините на оние кои го загубија животот во дискотеката „Пулс“ повикуваат на сплотеност и поддршка од граѓаните на маршот.

„Маршираме од Плоштад Македонија преку Собранието кон Основниот кривичен суд. 

Ние веруваме дека Македонија има совест. Дека знаеме да се сплотиме кога најмногу боли.

И дека сме подготвени, заедно, да се исправиме против најголемото зло – корупцијата што им го одзеде животот на нашите деца.

Болката е наша, но борбата е на сите нас. Се гледаме во сабота на плоштад Македонија!“

Погледнете го видеото:

А. Ј. | Црнобело