Михаил Корубин со промоција на книгата „Артокенс“ и голема изложба во Скопје

Детали

понеделник, 20 октомври 2025

„Во книгата ќе ги најдете примарните Артокени за создавање реченици, вклучувајќи заменки, придавки, сврзници, глаголи, членови, како и броевите од 0 до 9“, вели Михаил Корубин, кој неделава ќе ја отвори изложбата „Артокенс генеза” во Скопје.

Откако во 2023 година Михаил Корубин имаше изложба во Скопје, на која премиерно ги покажа своите артокени, сега, познатиот уметник, организира нова изложба наречена „Артокенс генеза“, но и промоција на книгата „Арокенс“.

„По две години, со задоволство ја споделувам со вас првата Артокенс книга, која ќе биде презентирана на изложбата „Артокенс генеза” во среда, 22-ри октомври, на Факултетот за ликовни уметности во Скопје.

Артокенс книгата е двојазична (на англиски и на македонски) и ја содржи генезата на овие симболи, сите супериорни и примарни Артокени, начинот на нивно пишување, како и нивните правила и синтакса.

За првпат, во неа ќе ги најдете примарните Артокени за создавање реченици, вклучувајќи заменки, придавки, сврзници, глаголи, членови, како и броевите од 0 до 9“, вели Корубин.

Претходно, во интервју за CRNOBELO.com, тој го објасни значењето на Артокените.

„Артокени или Artokens е кованица која јас ја комбинирав од зборовите „Арт” (уметност) и „Токен” (знак, симбол, подарок) со кои ги нареков овие цртежи.

Овие дела преставуваат една уметничка репрезентација на разни емоции, карактери, природни појави, секојдневни и несекојдневни евенти.

Секој Артокен претставува одреден збор стилизиран преку неколку основни и едноставни геометриски слики како круг, триаголник, права линија и шестоаголник кои создаваат една минималистичка естетика.

Овие цртежи се знаковен ликовен јазик, симболи, прецизна геометрија во функција на едно ново писмо.

За сега овие знаци се само поединечни, еден симбол, еден збор, една мисла, но моментaлно работам и на цела структура со која ќе може и да се испише една симплифицирана, но ефективна реченица.

Погледот во моите ликови содржи сопствена мистична приказна креирана од восприемачот, но вo овој случај Артокенот и неговото значење му даваат една одредена дополнителна содржина со која таа приказна добива една поконретна насока“, рече Михаил во интервјуто.

Книгата „Артокенс“ ќе може да се набави прво на самата изложба, а ден потоа и преку веб-сајтот.

Прочитајте и Михаил Корубин: „Моите ми направија прва ‘изложба’ дома на 6-7 години, израснав во ателјеата на татко ми и дедо ми“

А. Ј. | Црнобело