Познати личности кои се борат со болести

Детали

четврток, 20 јули 2017

Иако Холивуд се поврзува само со гламур и лукзусен живот, а славните личности се претставени како идеални и совршени, дел од нив секојдневно водат борба со болести.  Сите сме луѓе и сите сме подложни на опасности по здравјето.

Некои актери и музичари не сакаат јавно да зборуваат на оваа тема, но некои отворено споделуваат што им се случува со цел да им помогнат на луѓето кои се соочуваат со исти или слични здравствени проблеми.

Јоланда, Бела и Анвар Хадид

По неколку неуспешни дијагнози за болест чии симптоми се хроничен умор, вртоглавици и болка во телото, Јоланда Хадид конечно откри дека има „Лајмска болест“. Хадид постојано зборува јавно и има цел да ја подигне свеста за оваа болест, а неодамна откри дека и нејзините две деца, Бела и Анвар страдаат од истата болест.

Ник Кенон

Поранешниот сопруг на Мараја Кери страда од болеста лупус. Лупус е автоимуна болест кога имунолошките клетки ги напаѓаат здравите клетки во организмот. По дијагнозата, актерот комплетно го сменил начинот на живот, а прима и редовна терапија. Кенон постојано истакнува дека здравјето треба секогаш да биде приоритет број 1 кај сите.

Лил Вејн

Битката со епилепсија на Лил Вејн започна во 2013-тата година, кога раперот беше хоспитализиран поради напад. Сепак, Лил Вејн не сака често да зборува на оваа тема и многумина сметаат дека не е доволно свесен и одговорен за болеста. Минатата година, раперот претрпе уште неколку напади и започна со редовна терапија.

Селена Гомез

Селена Гомез криеше дека има лупус две години пред јавно да зборува за оваа тема. Таа изјави дека се лечела со хемотерапија и дека тоа ѝ помогнало на почетокот. Селена отворено зборува за болеста и се труди да ја подигне свеста, особено кај младите.

Сара Хајленд

Ѕвездата од „Модерно семејство“ вели дека отсекогаш имала многу здравствени проблеми, а пред неколку години ѝ дијагностицирале дисплазија на бубрегот. Во 2012-тата година, состојбата толку ѝ се влошила, што морала да направи трансплантација. Нејзиниот татко ѝ донирал бубрег и оттогаш, Сара е вклучена во многу активности поврзани со болести на бубрезите.

М. В. | Црнобело