Зошто славните често се разболуваат од лајмска болест (што се добива од крлежи), според доктор

Детали

недела, 21 јули 2024

Бела Хадид, Аврил Лавињ, Џастин Бибер, Бен Стилер, Ејми Шумер... Ова се само некои од славните личности што во изминатите години отворено зборуваа за нивната борба со лајмската болест. Зошто познатите најмногу страдаат од болеста што се пренесува со крлежи, според доктор.

Бела Хадид, пак, објави и серија фотографии со кои покажа дека животот со оваа болест, која се добива од убод на крлежи, воопшто не е лесен.

Лајмската болест е бактериско заболување кое се пренесува преку крлежи и предизвикува симптоми што наликуваат на настинка, со чувство на замор, главоболка, отечени зглобови и треска.

Оваа состојба може да трае со недели, но кај некои пациенти симптомите траат со години, за што лекарите немаат објаснување.

Прочитајте и Бела Хадид покажа како изгледа тешката борба со лајмската болест, која се добива од убод од крлеж

Во 2020-та година, Џастин Бибер, по гласините дека консумира опојни супстанци, ги информира обожавателите дека има лајмска болест.

„Луѓето велат дека изгледам како да користам метамфетамини, но не знаат дека неодамна ми дијагностицираа лајмска болест, и тоа не беше сè, туку се соочив и со инфективна мононуклеоза, што влијаеше врз изгледот на мојата кожа, врз функционирањето на мозокот, енергијата и целокупното здравје“ – рече тој.

Актерот Бен Стилер, пак, рече дека во 2011-та година заболел од болеста.

На почетокот имал воспаление на коленото, па подоцна лекарите утврдиле дека боледува од лајмска болест.

Меѓу славните што отворено зборуваа за оваа болест беше и пејачката Аврил Лавињ, која во 2014-та година откри:

„Се чувствував како да не можам да дишам, не можев да зборувам, ниту да се движам. Мислев дека умирам“.

Пејачката откри дека со месеци чувствувала вртоглавици и била летаргична, а во друга пригода откри дека две години не можела ниту да стане од кревет.

Но, ова се само дел од славните што низ годините отворено зборуваа за болеста. И, тука сосема нормално се поставува прашањето - зошто толку многу славни личности заболуваат од болеста која се пренесува од крлежи?

Нели славните живеат на висока нога и немаат пристап до овие паразити?

Според професорот Пол Хантер, кој е експерт за инфективни болести во Англија, токму нивниот начин на живот ги прави славните поподложни на болеста.

Тој во изјава за Daily Mail вели дека тоа што познатите ѕвезди имаат повеќе слободно време и го поминуваат на отворените зелени површини каде што има крлежи, ги прави да бидат многу поподложни на болеста.

„Ако некои познати и богати луѓе почесто ја добиваат болеста, тоа е најверојатно затоа што поминуваат повеќе време шетајќи по паркови, повеќе пати да одат на одмори на такви места или, пак, да купуваат големи палати, кои имаат паркови и шуми околу нив“ – вели тој.

„Додека се шетате, крлежите скокаат на вашите нозе и се качуваат нагоре. Ви ја цицаат крвта и ќе ве заразат со лајмска болест.

Затоа, ако се шетате на вакви места, најдобро е да проверите кога ќе си дојдете дома дали имате крлежи и ако имате, да ги отстраните безбедно“ – вели тој.

Прочитајте и Сезона на крлежи: Зошто овие паразити се опасни, што да правите при убод и како да се заштитите?

Б. С. Б. | Црнобело