Се онесвестуваат, плачат: Тајландската лотарија за служење војска стана вирална (видео)

Детали

четврток, 16 април 2026

Во Тајланд секоја година се одржува лотарија за служење војска. Мажите на возраст од 21 година влечат картички во две бои – црна која ги ослободува од војска и црвена која значи дека ќе треба да служат две години. Нивните хистерични реакции од годинашната лотарија веќе се споделуваат вирално, а некои го споредуваат настанот со The Hunger Games.

Ако имате навика да гледате видеа на Инстаграм и ТикТок, можеби сте налетале на видеа од тајландската лотарија за служење војска.

Видеата почнаа да се споделуваат вирално поради реакциите на младите мажи – оние кои треба да служат војска плачат, па и се онесвестуваат, а оние кои „се спасиле“ неретко скокаат од радост.

Во Тајланд, мажите кои имаат 21 година треба да волонтираат да служат војска. Оние кои нема да се пријават своеволно мора да учествуваат во лотаријата која се одржува во април.

Мажите кои учествуваат во лотаријата се собрани во огромна просторија и еден по еден влечат картички – црна или црвена.

Ако извлечат црна, тоа значи дека не мора да служат воен рок, но ако извлечат црвена, тогаш ќе треба да отслужат две години.

Реакциите на мажите се во најмала рака хистерични, а некои веќе ја споредуваат лотаријата со серијалот The Hunger Games.

За новинската агенција AFP, се огласил 21-годишен маж кој работел како продавач во маркет и годинава учествувал волотаријата:

„Што и да изберам е во ред. Ѝ оставам сè на судбината. Не е многу тешко бидејќи воениот рок е само две години“.

Подоцна мажот извлекол црвена картичка, па наредните две години ќе треба да оди во војска.

Неговата мајка, пак, истакнува дека за секој маж во Тајланд било голема почест да служи војска.

Сите мажи кои се во добра здравствена состојба се очекува да се пријават на лотаријата. Доколку некој проба да се скрие, може да добие и до три години зад решетки.

Но, некои пробуваат да го измамат системот. Пред да се пријават во лотаријата, мажите прават неколку тестови за нивната физичка и здравствена состојба и треба да имаат висина од најмалку 160 сантиметри, но и здрава тежина.

Според Independent, изминативе неколку години млади мажи кои ги исполнувале условите намерно се здебелувале со надеж дека нема да мора да служат војска.

Оние кои ќе служат воен рок ќе добиваат плата од околу 290 евра – сума малку повисока од минималната плата во Тајланд.

Покрај тоа, ќе им биде овозможено сместување, храна и здравствени услуги.

Иако некои Тајланѓанци сметаат дека воениот рок е почест, некои луѓе се противат на лотаријата и сметаат дека двете години во војска можат да имаат лошо влијание врз кариерата на младите мажи.

Спирова С. | Црнобело