Вирално видео од Украина го расплака светот: Мајка со солзи во очите ја прегрнува жената која ѝ ги пренела децата преку граница
- Детали
- недела, 27 февруари 2022
Мајката била надвор од земјата кога почнал нападот на Украина, а таткото кој не смеел да ја напушти земјата очајно барал помош од непознати луѓе да ги пренесат неговите малолетни деца преку граница.
Фото: Reuters
Своите возрасни деца морала да ги остави во родната земја, која е погодена со војна, но Наталија Абелејева (58) во саботата ја поминала украинско-унгарската граница, а со себе носела две деца на сосема непозната жена.
Како што раскажува за светските медиуми, пред да ја премине границата таа се запознала со 38-годишниот маж кој со себеси ги носел своите малолетни син и ќерка и очајно барал помош.
Додека граничарите не му дозволувале да ја помине границата заради општата мобилизација во земјата, тој барал некој што ќе му помогне да ги пренесе неговите деца преку границата на безбедно каде ги чекала нивната мајка, Ана Семјук (33).
„Таткото едноставно ми ги предаде децата и ми веруваше дека ќе ги пренесам“ – вели Наталија.
Тој ѝ појаснил дека мајката на децата доаѓала од Италија за да ги земе, ѝ го дал нејзиниот телефонски број и се збогувал со нив.
Наталија, морала зад себе да ги остави своите возрасни деца кои работеле како полицаец и медицинска сестра и не им било дозволено да ја напуштат земјата, но одлучила да му помогне на очајниот маж.
Ја поминале границата, а видеото од мигот кога мајката ги здогледува своите деца и како со солзи во очите ѝ се заблагодарува на непознатата жена за добрината брзо се прошири на социјалните мрежи.
Б. С. Б. | Црнобело