Мудра приказна: Зборовите рануваат, но и лекуваат

Еднаш, еден светец шетал низ природата и додека поминувал покрај малото село, му пришла расплакана жена, преколнувајќи го да дојде и да му помогне на нејзиното болно дете.

Тој отишол во селото и стотици луѓе се насобрале околу него, бидејќи ретко можело да се види таков човек. Му го донеле болното дете, а тој застанал над него и почнал да кажува молитва.

„Зар навистина мислиш дека твојата молитва ќе му помогне, кога ни медицината не успеа?“ – се развикал еден човек  од толпата.

„Што знаеш ти за овие работи? Ти си една обична будала!“ – му одговорил светецот на човекот.

Тој страшно се налутил, неговото лице поцрвенело и почнал да се мурти.

Таман сакал да каже нешто и да го нападне светецот, тој му пришол и му рекол: „Ако еден збор има толкава сила за да те разлути, зошто некој друг збор да нема моќ да излечи?“

Кога го слушнал тоа, човекот размислил и се смирил. Така, светецот во ист ден излечил двајца само со добри зборови.