Сѐ што сакам да му кажам на детето во мене

Слушни ме што ќе ти кажам сега. Мало си и не знаеш ништо, иако мислиш дека си најпаметното суштество кое одело на планетава. Врска немаш верувај ми.

Кога веќе зборуваме за верба, не им верувај толку многу на сите, затоа што луѓето многу често ќе те разочаруваат, а тоа ќе боли толку многу што ќе посакаш да си ја искорнеш кожата и да престанеш да бидеш човек. Но, не грижи се, таквото чувство поминува.

Ќе ти го кршат срцето толку многу што не ќе знаеш како изгледа љубовта и ќе престанеш да веруваш во неа, ама ќе дојде време кога конечно ќе вкусиш среќа. Сега, со солзи си во очињата знам и нема кој да ти ги избрише, но некој ќе се појави подоцна.

Знам дека мислиш дека никој не те сака, но не си ги пронашла вистинските луѓе. Оние со кои ќе поминуваш по цели ноќи заедно тресејќи глупости и смеејќи се. Ќе имате многу луди моменти, ќе одите на многу добри журки и ќе го видите вашиот омилен бенд заедно. Ќе гледате изгрејсонца и зајдисонца заедно. Ќе пиете кафе на таа твоја совршена тераса и ќе зборувате за сѐ.

Сега ти е многу тешко и душата те боли, но сѐ има крај. Ќе научиш да се облекуваш убаво, дури и да се шминкаш. Ќе привлекуваш погледи и ќе бидеш шармантна дама каква што отсекогаш си сакала и си им се восхитувала. Ќе имаш добар и изострен вкус за облека, но малку ќе штрчиш. Ама, ако, убаво е така. Уникатните луѓе се оние кои се забележани, а не оние кои целосно се вклопуваат.

Ќе бидеш успешна во она што најмногу го сакаш и верувај ми подобра си отколку што мислиш. Тоа ќе ти го потврдат безброј луѓе, а и професионалци кои ќе сакаат да соработуваат со тебе. И плус ќе заработуваш од тоа.

Но, ќе знаеш и премногу да работиш за да не се соочиш со проблемите кои те мачат. Во тие моменти ќе „растуриш“ на професионално ниво, но внатре ќе бидеш уништена и ќе бараш спас во купот работа. А, сама ќе дознаеш дека спасот се крие во тоа да престанеш да се заморуваш со ситници кои воопшто не ти го дефинираат животот иако ти така мислиш.

Ќе научиш да попушташ и дека не секогаш мора да биде по твое. Особено ако некој сакаш да го задржиш покрај тебе, тогаш дефинитивно ќе попушташ. Ама ќе научиш и да велиш „не“ затоа што така ќе покажеш дека си силна и дека имаш став. Уште поважно, ќе сфатиш кои луѓе заслужуваат да останат покрај тебе, а од кои треба да се ослободиш по брза постапка.

И најважната лекција која што ќе ја научиш мило мое детенце е таа дека вредиш многу повеќе отколку што мислиш. И ќе се носиш така и ќе бидеш таква. Ќе чекориш со високо крената глава, ќе заведуваш со самодоверба и кога некој не е достоен да биде покрај тебе, ќе најдеш начин да се простиш од него.

Не велам дека ни тогаш нема да те боли – секогаш однатре ќе умираш, ама по некое време ќе ти помине. Сакам да ти кажам да уживаш додека си мало, бидејќи кога ќе пораснеш ќе те чекаат многу одговорности и ќе мораш да носиш тешки одлуки за твое добро, но тоа сепак не значи дека нема да бидат тешки.

Уживај во животот и престани да мислиш толку многу. Бурата ќе помине. Не оставај младоста да ти помине. 

С. С. | Црнобело