Сиромаштија, зависници: „Мрачната“ страна на Америка којашто не ја гледаме во филмовите

„Кога бев млад, сакав да се преселам во САД. Кога отидов, бев шокиран од многуте бездомници и зависници од дрога по улиците, од приказните на луѓето чии животи се уништиле поради медицински долгови. Од тоа што немаат право на годишен одмор и бесплатно здравство“.

Многу луѓе сонуваат да живеат во САД, земјата каде што наводно можеме да си го исполниме секој сон.

Неретко поради холивудските филмови, оние кои никогаш не ја посетиле САД, ја доживуваат како утопија и земја во која можат да успеат сите.

Но, времињата се менуваат и ако некогаш животот во Америка бил идиличен, денес ни таму не им е лесно на „обичните“ луѓе.

А, ова најдобро го сфаќаат луѓе кои првпат ја посетиле земјата и нивните очекувања не биле воопшто исполнети. Односно, доживеале таканаречен културен шок.

На Редит, неколку луѓе кои ја посетиле САД споделуваат што најмногу ги изненадило, и тоа непријатно:

„Бездомници кои работат. Луѓе со полно работно време кои мораат да живеат во нивниот автомобил“.

„Отсекогаш ми кажувале дека ’Америка е најдобрата земја во светот‘ и кога бев млад, дури и сакав да се преселам таму.

Кога отидов, бев шокиран од многуте бездомници и зависници од дрога по улиците, од приказните на луѓето чии животи се уништиле поради медицински долгови. Од тоа што немаат право на годишен одмор и бесплатно здравство“.

„Никаде не можеш да отидеш пеш, мора да имаш автомобил за буквално секаде“.

„Постари луѓе кои работат. Во хотелот имаше келнерка која сигурно имаше 80 години. Се растажив бидејќи мора да работи на таа возраст“.

„Големината на порциите во рестораните – сè е огромно“.

„Навистина е тешко да се најде здрава храна. Во големите градови е достапна, но во помалите места е речиси невозможно да најдеш зеленчук или овошје“.

„Малку бев нервозна бидејќи знам дека секој може да носи оружје. Сакаш да одиш до продавница? Внимавај, бидејќи некој може да почне да пука.

Еден ден пред да го посетиме Mall of America со семејството, таму имаше пукање“.

„Најмногу ме изненади огромниот број луѓе кои очигледно имаат проблеми со менталното здравје, но се оставени сами на себе. Знам дека и во други земји здравството не е совршено, но во Њујорк имаше премногу вакви луѓе“.

Спирова С. | Црнобело