Опкружете се со луѓе кои ви поставуваат повисоки стандарди отколку вие самите

Ако сакате да се подобрите во животот во кое било поле, тогаш треба околу себе да ги држите луѓето кои дефинираат повисоки стандарди од оние кои самите си ги поставувате.

Социјалната психологија е доста интересна гранка која објаснува како луѓето ги формираат групите околу себе, без разлика на која возраст и да се наоѓаат.

Како и во многу ситуации, така и склопувањето пријателства во најмладите години се одвива по линија на најмал отпор, бидејќи за пријател во училиште го бираме најчесто оној кој седи во клупата со нас.

Но, во текот на животот тие нешта се менуваат. Социоекономските истражувања покажале дека самите можеме многу да напредуваме доколку се дружиме со луѓе кои исто така напредуваат или веќе се понапред од нас.

Од друга страна, ако се дружиме со полоши од нас, остануваме заробени во една просечност од која тешко се мрднува напред.

Ти си тоа што го јадеш

Јадењето во овој случај има преносна смисла. Додека растете, стекнувате сè повеќе самоконтрола врз она што го правите. Најголемиот чекор е кога ќе решите дека сакате и можете да бидете подобри од она што сте.

Многумина никогаш не би излегле од комфорната зона, но постојат и оние кои сакаат да ризикуваат и да ги тестираат своите граници. Затоа и постои познатата изрека: „Постојат два типа на луѓе - оние кои постигнуваат резултати и оние кои наоѓаат оправдување зошто не постигнуваат резултати.“

Во својот живот вие сте тие кои избирате, почнувајќи од стручно и професионално образование, работа, место на живеење, па сè до луѓето со кои сте опкружени.

Затоа, ако забележите дека тонете во просечност која не е добра за вас, потребно е да си зададете нов предизвик. Бидете со оние кои одат напред, а не со оние кои ве влечат надолу. Тоа е најдоброто нешто што можете да си го направите за себе.

Е. Д. | Црнобело