Ако вашата другарка се здебели, ќе го следите и вие примерот - преку вежба откријте како вашите пријатели ви влијаат

Со оваа едноставна вежба ќе утврдите колку влијаат вашите најблиски пријатели врз вашите особини, дали тоа е позитивно или негативно, но и како да го извлечете најдоброто од ова влијание.

Луѓето коишто нè опкружуваат го сочинуваат нашето „племе“ и ние, на некој начин, се адаптираме согласно тоа што тие го емитуваат како енергија. Начинот на којшто живеат, нивните мисли и верувања влијаат на нашите мисли, расположение и однесување.

Формулацијата која ја употребуваат психолозите и социолозите опишувајќи ги ваквите друштвени врски е „преносна зараза“ или несвесно моделирање. Нам најмногу ни влијаат луѓето од најблиската околина и тоа со своите навики, емоции, уверувања, животни вредности, па дури и финансиите.

Студиите покажуваат дека доколку вашата најдобра другарка се здебели, шансите да ви се случи тоа и вам се 57%. Ова можеби најдобро го покажува влијанието што го имаат нашите блиски пријатели врз нас.

Всушност, се верува дека секој од нас е „комбинација“ од петте луѓе со кои го поминува најголемиот дел од времето.

Погледнете околу себе и размислете – кого вие свесно или несвесно моделирате?

Вежбата во продолжение ќе ви помогне да утврдите колкаво е влијанието на најблиските луѓе врз вас, но и дали е позитивно и негативно. Ќе треба и да размислите за ова влијание за да го извлечете најдоброто од него.

За вежбата ќе ви бидат потребни само пенкало и лист хартија. 

1. Нацртајте стебло со 5 гранки. На секоја од нив напишете го името на петте ваши најблиски или најдобри пријатели или членови на семејството, луѓе кои ви се особено важни и со кои го поминувате најголемиот дел од времето.

2. На секоја гранка, покрај името на личноста, напишете по 5 збора кои најдобро ги опишуваат секој од нив. Тие 5 збора може да бидат и позитивни и негативни. Треба само реално да ја отсликуваат личноста којашто сте ја впишале на гранката.

3. Покрај секоја карактеристика на пријателите која сметате дека е и вашата силна или добра страна ставете знак * (ѕвездичка). Покрај секоја негативна особина што ја имате и вие ставете знак х (икс).

4. Размислете дали и како можете да ги промените иксовите во ѕвездички. Потоа размислете добро за сите 25 карактерни особини, ставови, вредности и навики коишто сте ги запишале, затоа што сите тие влијаат врз вас.

Што заклучивте? Дали интеракцијата со овие 5 луѓе ве прави послаби или посилни како личност? Дали тие имаат позитивно, или негативно влијание врз вас? 

(О)Милена | Црнобело