Луѓе ја споделуваат мрачната страна на нивната кариера: „Го истражувам ракот кај деца – гледам многу смртни случаи“

„Работам во зоолошка градина. Дали некогаш сте помирисале урина на лав? Сигурно не сакате. Не можете да замислите колку е лошо. Треба да бидете малку луди за да почнете да го работите ова. Мојот нос уште ми нема простено“.

Секој од нас си има работа од соништата за која мислиме дека е совршена. Неретко настојуваме да го гледаме ова посакувано работно место низ розови очила и не ни помислуваме на предизвиците што ги носи.

Убедени сме дека штом го работиме она што вистински го сакаме, сигурно нема да ни биде лошо.

Но, факт е дека и најпримамливите работни места имаат своја мрачна страна, без разлика колку добро се платени.

На Редит, неколку луѓе ја споделуваат мрачната страна на нивната кариера:

„Детектив. 17 години го работам ова и мојот психијатар се согласува дека можеби веќе е доста. Гледам толку многу мртви луѓе кои умреле на разни начини.

Убиствата, самоубиствата и предозирањата си го земаат својот данок. Платата не е одлична, а емоционалната траума само додава на проблемот“.

„Јас сум научник. Тоа значи дека не заработувам многу и никој не слуша што кажувам“.

„Научник за истражување рак кај деца. Многу деца кои се дел од нашите истражувања ќе умрат“.

„Јас сум менаџер во супермаркет. Платата е добра, но смените се ужас. Ако сакате да го видите најлошото кај луѓето, работете со нив. Воопшто не им е грижа за вас, за вашиот живот, за вашата работа…“

„Социјален работник (во САД) – секој систем со којшто работиме е ужасен. Траумата низ којашто минуваат децата ќе ве скрши. Го работам ова веќе 4 години и ги чувствувам последиците“.

„Кол-центар за техничка поддршка. Работата ми се состои од тоа да им помагам на луѓе кои ме третираат како јас да сум им ги расипал уредите“.

„Редактор на книги. Порано многу сакав да читам. Но, сега ги гледам книгите како работа и не ги ни допирам по работното време“.

„Работам во зоолошка градина. Дали некогаш сте помирисале урина на лав? Сигурно не сакате. Не можете да замислите колку е лошо. Треба да бидете малку луди за да почнете да го работите ова. Мојот нос уште ми нема простено“.

„Новинар. Луѓето ширум светот нè мразат само затоа што пренесуваме настани. Многумина бегаат од индустријата поради страв за нивната безбедност и стресот, откако вербалните и физичките напади станаа поизразени“.

„Водоводџија – заработувам многу, но патот дотука е долг. Оваа работа ќе ви го уништи телото и е стресна и физички и психички.

Ќе имате повреди, ќе имате хронична болка. Јас ги охрабрувам сите мои чираци да си најдат работа во канцеларија“.

„Камионџија. Убаво е што работам сам и можам да се прошетам, но работата ми го уништува социјалниот живот. Имам само еден слободен ден секоја недела, па секој месец минувам само 3-4 дена дома.

Во тој краток период треба да се социјализирам, да го видам семејството и да ги завршам сите обврски дома“.

„Софтверски инженер – долги работни часови. Платата е добра, но најголем дел од времето минувате во состаноци објаснувајќи им на луѓето зошто не можете да направите нешто за само три часа.

Сите во семејството те прашуваат зошто не копаш криптовалути или зошто не си милионер досега. IT секторот беше најзабавното нешто, но потоа стана профитабилен“.

Спирова С. | Црнобело