7 модни трендови поради кои ѝ се радуваме на пролетта

Сончевата сезона е на прагот, па не очекува наплив од прекрасни парчиња за пролетните денови. Кои се нашите топ фаворити?

Новото годишно доба е вистинско време за експериментирање со стилот. Ниските температури и сивилото се зад нас, а на сцената се враќаат веселите и интензивни бои, цветните дезени и мотиви, лелеавите материјали и неизбежните фустани. Звучи супер, зар не?

Што ќе се носи претстојната сезона? Ви издвојуваме неколку парчиња облека и додатоци што може да ги облечете уште сега, или, пак, барем да се подготвите до пролетта, која календарски пристигнува за неколку дена.

Слоевитите лесни стајлинзи ќе доминираат наредните месеци, а овие модни елементи, дефинитивно ќе ви го подобрат целокупниот аутфит. Одберете ги омилените, па впуштете се во лежерно комбинирање.

Седумте модни трендови поради кои ѝ се радуваме на пролетта се:

1. Бел блејзер

Моќните одела и формалното облекување ја сочинуваат сржта на повеќето модерни стајлинзи. Оваа пролет, инвестирајте во бел блејзер.

Покрај тоа што ќе изгледате одлично, ова парче е и мошне едноставно за комбинирање. Прилега на сѐ, а особено стои во пар со добар џинс или панталони.

2. Некласичен мантил

Некогаш се носеа исклучиво беж мантили. Денес се достапни во сите можни нијанси и дезени, а се избработуваат од секакви материјали.

Обидете се во својата гардероба да внесете што поколоритен – во впечатлива боја или со интересен принт. Вашиот стил ќе доживее инстантна пролетна промена.

3. Пуфкасти ракави

Отворените блузи со голи рамена беа хит минатата година. Претстојната пролет, пак, главниот фокус ќе биде насочен на ракавите.

Предимензионираниот „пуф“ крој ќе ги разигра повеќето парчиња облека на градските улици.

4. Темни фармерки

Доколку се чувствувате пријатно во фармерки, па би сакале да ги носите и на работа, тогаш вложете пари во тексас со темна боја.

Ваквите модели може да пројдат и како класични панталони, вклопени со убаво сако и префинети потпетици.

5. Пастелни аксесоари

Од светло сини до нијанси на лаванда, невозможно е да погрешите со ниту една пастелна боја. 

Таа веднаш ќе внесе забавна нота во вашиот аутфит. Па, зошто да не го „отворите“ пролетниот шопинг со една чанта во овие тонови?

6. Пругаст дезен

Пругите се модна класика што одлично изгледа на сите парчиња облека. Синоним се за францускиот шик и елеганција.

Од одела и маички, па до панталони и кошули, пругастиот дезен ќе ви биде најдобар сојузник и оваа пролет.

7. Облека со точки

Ретро принтот одново се враќа на модната сцена. И тоа на голема врата. 

Претстојната сезона, сигурно ќе ви биде мило да ги носите парчињата со точки, во сите бои и големини.

Имате ли свој фаворит меѓу пролетните трендови?

М. А. | Црнобело