Го посетив селото на Попај морнарот во Малта - бајковита дестинација која ме врати во детството и ми разбуди носталгија

Симпатични, насмеани и спремни за дружба, Попај, неговата сакана Олива и ривалот Дибек нè пречекаа на влезот на селото.

Веднаш нè информираа за дневната програма, за шоута на сцената пред пожарната кое беше двапати дневно, за киното во кое имаше проекција за легендарниот филм и за сите мали скриени катчиња со интересни и друштвени игри.

Актерите, исто како и целото село, беа со автентична облека, што уште повеќе нè враќаше назад во детските години. Се дружеа со децата и не одбиваа фотографии, а се прилично добри модели во стилот на хероите од филмот.

А за заокружување на целиот ден во филмски стил, и ние бевме дел од продукцијата на малтешкиот Дизни.

На крајот на посетата, Попај ги праша посетителите кој сака да биде дел од нивната импровизирана и кратка верзија на Попај морнарот.

Секако дека јас и моите колеги од бродот ја прифативме оваа неодолива понуда, а Попај покрај што е херој, се покажа и како одличен продуцент и камерман.

Снимањето траеше околу половина час, а по експресната пост-продукција, нашиот филм беше премиерно прикажан во киното. Плативме пет евра за да добиеме копија од ова ремек-дело.

Селото затвори околу 18 часот, совршено време за да се заврши денот со волшебно зајдисонце над заливот, како јаготка на шлагот.

Сонцето полека се губеше во азурната морска шир, играјќи си со сенките од карпите на заливот.

Иако беше малку опасно да се стои на самиот раб, со многу внимание и мали чекори, најдовме совршено место за да бидеме сведоци на природната убавина.

Сепак, Медитеранот не бил Медитеран без тие волшебни зајдисонца кои оставаат без здив.

Ако ова лето Малта е вашиот избор на одмор, покрај Гозо и Комино, Paradise Baqy и Blue Grotto, најдете време да го посетите селото на Попај и да се потсетите на безгрижните детски дни и чинија спанаќ.

Повеќе фотки од шармантното село на следната страница...