Училиште во скопски Карпош има кул уредено дворче – заедно прават украси од стари предмети, уживаат во катчиња за учење

Детали

среда, 27 мај 2026

„Eдна огромна внатрешна дворна површина, некогашна руинирана фонтана без никаква функција, ја претворивме во уникатна отворена училница. Се облековме во работнички мантили, ставивме ракавици и се фативме за работа. Со добра музика во позадина и силна мотивација, пластичните шишиња станаа украси и саксии, даските и гумите се претворија во масички и столчиња, комплетно уредивме катчиња за учење и дружење“ - вели за CRNOBELO.com Рената Поповска, педагог во ООУ „Лазо Трповски“. 

Во основното училиште „Лазо Трповски“ во скопската општина Карпош, освен просториите за учење и рекреација, имаат и кул уредени дворчиња.

Креативниот персонал, меѓу кои педагогот и неколку наставници, заедно со учениците, си создале уникатен и прекрасно уреден простор, со катчиња за учење, но и за уживање за време на одморите.

Тие се доказ дека кога се сака – сè е возможно и дека училиштето може да се направи пријатно место каде сите заедно ќе уживаат во времето поминато таму.

Поразговаравме со Рената Поповска, училишниот педагог, која ни раскажа малку повеќе за идејата и реализацијата.

Педагогот Рената Поповска за CRNOBELO.com вели:

„Во светов во коj има многу сивило, разлеавме малку боја со мирис на љубов - во нашето училиште нацртавме шарена приказна која сакаме да ја живееме секој ден!

Промената не се чека, таа се создава и затоа решивме да си го разубавиме просторот во училиштето.

Eдна огромна внатрешна дворна површина, некогашна руинирана фонтана без никаква функција, ја претворивме во уникатна отворена училница – весело разнобојно место за учење и дружење.

На местото на старата фонтана поставивме трева и добивме оригинално име „Фонтана ди треви“ во наш слободен превод Фонтана со трева.

Се собравме група „непоправливи ентузијасти“: неколку наставници, родители, педагогот и нашите вредни ученици и поставивме правила на игра малку поинакви од училишното секојдневие.

Наместо класично испрашување, се случуваше масовно креирање, наместо учење од лекции, се учеше она најважното — одговорност, посветеност и меѓусебна почит и најјакото од сè: наместо два прста за збор, во воздух се креваа кутии со бои, четки и тешки палети!

Сите заедно, со беспрекорна организација и позитивна енергија, покажавме дека кога има визија, нема изговори.

Создадовме амбиент каде децата ќе бидат среќни, инспирирани и горди на сопствениот труд, а и ние на својот!

Како изгледаше тоа на терен? Вистинска шарена акција! Се облековме во работнички мантили, ставивме ракавици и се фативме за работа.

Со добра музика во позадина и силна мотивација се случуваше магија: пластичните шишиња станаа украси и саксии, даските и гумите се претворија во масички и столчиња, а отпадот — во разновидни креации.

Комплетно уредивме катчиња за учење и дружење, засадивме нови садници, а поставивме и сензорни табли и специјални катчиња за дечињата со попреченост. Едноставно, играрија без граници!

Со ова ги скршивме старите стереотипи и покажавме дека школото не е само место за часови, лекции и тестови.

Ние сме доказ дека може и поинаку – педагогот кај нас не е само за карање и советување, туку и мотиватор, креативец, уметник, молер, мајстор и поттикнувач на милион идеи.

Докажавме дека наставникот не е само за во училница, туку тој е лидер кој инспирира, засадува вистински вредности и најважните знаења за животот на децата им ги пренесува токму во ваков амбиент.

Продолжува на следната страница...