На гости кај Елена: Стан од 170m2 на поткровје на Водно - огромна кујна и многу светлина (фото)

Сметам дека е грешка кога луѓето бегаат од темни бои при дизајнирање на просторот во кој живеат. Тука имате слобода да играте со детали и украси во живи и светли бои или пастелни нијанси како што јас употребив.

Ова можам со сигурност да го кажам затоа што претходниот стан во кој живеевме беше целосно дизајниран во бели, крем и сиви нијанси, и верувајте ми на зборот дека сега кога ќе влезат во новиот стан нашите пријатели кажуваат дека се чувствуваат многу попријатно и потопло од претходно.

Скоро целиот мебел мојот сопруг го нарача од Италија, а останатиот мораше да биде изработен по мерка, заради нестандардните димензии на овој стан, особено по вертикала. Со архитектката одговорна за изработка се запознавме и засакавме до толку што целиот процес со неа, но и мајсторите беше лесен, забавен и креативен.

Многу време и највеќе внимание посветив на кујната која е нетипично голема, можам да кажам огромна, исклучително внимателно дизајнирана, почнувајќи од фиоките до работната плоча од ламинам. Мојот сопруг сака да готви и отсекогаш посакуваше голема кујна, особено затоа што половина од денот тој и моите синови го поминуваат таму.

Шанкот зазема централно и многу важно место во станот. Сè уште немаме одбрано шанк столчиња со кои тој би се комплетирал, и тоа треба што побргу да го направам затоа што Максим и Габриел обожуваат да седат на шанк и имаат најразлични активности додека јас или мојот сопруг готвиме.

Дневната е топла и пријатна, со големи удобни троседи во кремасто сива боја и тепих со пастелни нијанси. Целосно е опкружена со прозорци.

Во едниот дел, под самите прозори, кој е мој омилен дел од станот, дизајнирав миндер со удобни јастуци каде додека седиме можеме да ги гледаме децата како играат во дворот на нашата зграда веднаш под прозорците.

Продолжува на следната страна...