Биљана од Битола за патувањето во Британија: „Шкотланѓаните не носат ништо под килтот и се гордеат со тоа“

Детали

четврток, 22 мај 2025

„Сè беше убаво, но како мало разочарување би го споменала дека во Англија моравме да резервираме неколку дена однапред за во ресторан или паб, со точен број на присутни лица, а некаде дури требаше да наведеме и што би порачале за јадење“ - вели Биљана за CRNOBELO.com за патувањето во Шкотска и Англија што ја воодушевило.

Биљана Брајановска-Зарлинова, од Битола, долги години живее и работи во Скопје. По професија е дипломиран музичар - педагог, но веќе долго време работи маркетинг и промоција во МРТВ.

Таа низ годините работела и како музички промотер и ПР на голем број музички имиња како Влатко Лозаноски, „Браво бенд“, Александар Тарабунов, Димитар Андоновски, Симона Поповска, Урбан рекордс продукција, диџеј Галоски, но и за последната песна на Тоше Проески која излезе во 2024-та „Кажу да време лечи све“.

Биљана е голем љубител и на патувањата, па на почетокот на годината таа ја посети Велика Британија и тоа Шкотска и Англија.

За самото патување, искуствата, работите кои ја воодушевиле, таа ни раскажа во интервјуто за CRNOBELO.com:

Зошто ја избра Британија како дестинација за твоето последно патување? Дали организираше сè самата или беше преку агенција?

Исто како минатата година, така и оваа решив да отидам таму. Оваа дестинација е магична, а и нема нешто поубаво од тоа волшебните моменти да се споделат со семејството - а јас бев на гости кај сестра ми, нејзината прекрасна фамилија и пријателите коишто живеат таму.

Бев во сопствена приватна режија, со лет од Софија до Единбург.

Каква е процедурата за добивање виза (и колку пари чини)?

Процедурата за добивање виза е олеснета во споредба со минатите години, но во интерес на времето и сигурноста, ангажирав агенција за посредување, па моја единствена обврска беше да ги обезбедам потребните документи и да се појавам на термин во ТЛС центарот. 

Периодот на одобрување на визата беше 13 дена, а чинеше 200 фунти (14.600 ден) за визата и уште 3.000 ден за услугата за овој тип на апликација, кои ги платив на агенцијата.

Ова не е твое прво патување во Британија, но дали се сеќаваш на првиот впечаток што ти го остави земјата тогаш? И колку се смени тоа до денес (на поубаво или полошо)?

Првиот впечаток, пред точно 10 години, ми го остави сообраќајната електронска инфраструктура, а воедно и културата во сообраќајот, која сега е на многу повисоко ниво, вградена во смарт патиштата во земјата.

Како турист не би можела да коментирам за генералниот развој на земјата за овие 10-ина години, но впечатокот на моите блиски кои што живеат тука е дека после Брегзит, животот во Британија доживеа значителни промени и граѓаните се соочуваат со многу предизвици.

Што сè имаше можност да видиш во Шкотска - градови, познати локации, а што во Англија?

Еден од градовите што секогаш го посетувам кога патувам во Шкотска е Гретна, изграден за време на Првата светска војна, сместен на шкотската страна на границата со Англија.

Таму се наоѓа мојата омилена шопинг дестинација - Паркот Каледонија, кој е дом на над 50 светски брендови и дизајнерски парчиња.

Во Шкотска го посетив и градот Дамфрис, односно родниот град на еден од најпопуларните светски диџеи, продуцентот, пејач, текстописец и хитмејкер Калвин Харис.

Дамфрис е мирен град со куќички како од бајките, а областа Дамфрис и Галовеј имаат многу зелени површини, брановидно крајбрежје од карпести брегови и песочни плажи.

Како голем љубител на море и плажи, ги посетив плажите на северо-западниот брег на островот.

Ме фасцинираше плажата Повилмонт во Шкотска, која е неверојатно долга, со мешавина од карпести и песочни предели, со расфрлани разновидни школки и прекрасно зајдисонце.

Бев сведок на феноменот на плима и осека на Ирското море, поточно на моментот кога во утринските часови буквално нема море и има големо повлекување на водата, па посетителите играат тенис и други разновидни игри на големите пространства песок, а попладне следи целосно враќање на водата до крајбрежјето и карпите.

Продолжува на следната страница...