Моника Ризовска за патувањето во Јужна Африка: „Не ми беа потребни вакцини и не се осудив да пробам специјалитет од магаре“

Детали

четврток, 16 јули 2026

„Сè додека не отидов таму, не знаев дека Кејптаун ќе ми остане засекогаш во срцето, а oна на кое треба да се внимава е што во Јужна Африка се вози по левата страна на коловозот“, вели Моника Ризовска Таневска, која работно беше во Кејптаун, но се вљуби во Јужна Африка.

Моника Ризовска Таневска беше дел од претставувањето на Македонија на Women in Tech Global Summit во Кејптаун и вели дека на совршен начин ги споила работата и задоволството.

Моника вели: „Кога спомнав дека патувам во Јужна Африка, сите ми рекоа дека со нетрпение ги очекуваат впечатоците од атмосферата од таму.

За жал, не е честа дестинација а има навистина многу што да понуди. Оваа земја е далеку од сè досега што имам посетено и видено и токму тоа ја прави посебна“.

Moника ги споделува своите впечатоци за CRNOBELO.com:

„Моето патување беше со цел да ја претставам нашата земја, Македонија на Women in Tech Global Summit, и сè додека не отидов таму, не знаев дека Кејптаун ќе ми остане засекогаш во срцето.

За ова патување не беа потребни вакцини. Никакви посебни медицински подготовки. Само валидна виза и желба за авантура.

Едно на кое треба да се внимава, во Јужна Африка се вози по левата страна на коловозот, наследство од британскиот колонијализам. Ако планирате да возите сами, проверете дали ви треба меѓународна возачка дозвола.

Јужна Африка е прекрасен спој на бројни култури кои оставиле печат врз самото локално население, но и врз архитектурата, уште при пристигнувањето, видливо е холандското и англиското влијание.

Table Mountain е едно од 7-те природни чуда и местото каде светот завршува со поглед на два океана.

Постојат места на кои кога ќе застанеш, времето застанува заедно со тебе. Table Mountain е токму такво место.

Оваа рамно-врвна планина висока 1.086 метри го надгледува Кејптаун и е прогласена за едно од Новите 7 чуда на природата. Стара дури 600 милиони години, планината е направена главно од камбриумски песчар, нејзиниот карактеристичен рамен врв е резултат на милиони години ерозија.

Ние се качивме со жичницата со ротирачки подови, за 360-степени поглед додека се качувате и пред нас се простираа и Атлантскиот и Индискиот Океан истовремено.

На врвот ве чека 3-километарска патека за шетање, ресторани, продавници со сувенири, па дури и бесплатен WiFi.

Силните ветрови создаваат маглена облека над врвот. Легендата вели дека е натпреварување во пушење помеѓу пиратот Јан Хунис и ѓаволот.

Билет на жичницата карта  е околу 61-65$. За жал, не работи при силен ветер, секогаш проверете пред да тргнете.

Доколку се брзате, секогаш е подобро да ја купите картата електронски однапред преку официјалниот сајт. Изберете ја опцијата за „брза карта“ за да ги заобиколите редиците.

Наутро рано или доцна попладне има помалку луѓе, подобро осветлување, и зајдисонцето е незаборавно.

На листата ми беше и Boulder Beach, домот на пингвините.

Уште кога тргнав накај Јужна Африка неколку фотографии што излегуваат кога ќе изгуглате е плажата со пингвини. А како мајка на две мали тодлери кои обожаваат животни, особено пингвини, знаев дека ова е една од локациите што нема да ја испуштам и морам да ја ставам Boulder Beach.

Инаку позната е и како Boulders Bay и е плажа составена од гранитни карпи, стари 540 милиони години, сместена во Simon’s Town, во јужниот дел на Кејптаун.

Плажата е дел од Националниот парк Table Mountain и е позната ширум светот како колонија на африкански пингвини.

Во 1982 година на плажата се населиле само два пара пингвини. Денес нивната колонија брои околу 3.000.

Ова делумно се должи на забраната за комерцијален риболов во False Bay, со која се зголемила количината на сардини и аншоа, што е главна храна за пингвините.

Ова е едно од ретките места каде може да се набљудуваат овие пингвини на слобода и одблизу.

Пингвините најдобро се гледаат од Foxy Beach, каде новоизградени дрвени патеки ве водат на неколку метри од нив.

Во 2024 година, Boulder Beach беше прогласена за втора најдобра плажа во светот на Golden Beach Awards, а во 2025 ја рангираше на 12-то место во светот.

Продолжува на следната страница...