Средношколец од Неготино ја истражува Македонија со велосипед – во еден ден поминал 160km (фото)

Детали

среда, 08 декември 2021

Јани Иванов од Неготино е ученик во трета година во средното училиште СОУ„Св. Кирил и Методиј“ со интерес кон велосипедизам уште од најраните години, а во последните две-три години активно вози низ Македонија. 

Покрај тоа што ужива да патува со велосипед, Јани е дел од играорно друштво во неговиот град и посетува тренинзи по кик-бокс.

„Почнав да возам поголеми километражи благодарение на еден другар. Тој ме инспирираше најмногу зашто често го товареше велосипед со многу работи, а мене тоа ми беше интересно. Освен тоа гледав објави по социјалните мрежи од луѓе што возат на далечни дестинации и тоа ми беше дополнителен поттик да стартувам со истражување на Македонија, а потоа и подалеку“, споделува Јани кој обожава да прави фотографии со неговиот телефон за време на неговите велосипедски авантури.

Секогаш пред тргнување создава јасна цел во глава, си прави мапа за претстојната рута. Најчесто вози од неговиот град до некој друг град и попатни села, а посебно задоволство му прави возење низ шуми на високи места.

„Од сите тури, најинтересна ми е беше она кога возев до Прилеп и назад, истовремено таа ми е и најдолгата. Една вечер заедно со другарите тргнавме да возиме во еден по полноќ. Прво ги поминавме селата Јасеново и Извор и накај патот за Прилеп го искачивме и Плетвар, каде на половина од патот го дочекавме изгрејсонцето.

Потоа направивме пауза во планинарскиот дом Дервен, имавме доволно време да се одмориме и да направиме по некоја фотка, а потоа се спуштивме до Прилеп и го посетивме Прилепското Езеро. Имавме време да свртиме и некој круг низ град, а на враќање одлучивме да го посетиме и Мермерното Езеро.

Искачувањето беше доста напорно, но на крај се исплатеше… Откако го спуштивме Плетвар, поминавме и до Кавадарци и Градско, а јас од таму продолжив за Неготино“, раскажува Јани за својата прва голема авантура на која е посебно горд.

Јани во еден ден има поминато 160 километри. Многу често знае да вози и во ноќните часови, а тогаш, како што вели тој, доживувањата се посебни поради тишината и ѕвездите што сјаат на небото.

„Сум имал секакви случки, некогаш среде возење се случувало да ми се дупне гумата, а тоа е и најчестиот проблем со кој се соочувам. Еднаш морав да сменам три гуми во еден ден, тоа ми беше најмачното возење…“, се присетува Јани.

Понекогаш се случувало да заглави во густ сообраќај или да се најде на тесен пат, но во такви ситуации Јани многу внимава, зашто со мало дефокусирање можат да настанат незгодни ситуации.

„Се случува кога ќе влеземе во некои села, луѓето да почнат да се интересираат за нашето патување. Нè прашуваат од каде сме, каде возиме… Имам сретнато многу фини луѓе, а еднаш еден дедо ни ја раскажа целата негова младост“, се присетува Јани.

Ранецот на секое патување му е полн со резервни гуми, батерија на полнење, светла, облека, јадење, а понекогаш и алат.

„Да заминам на пат околу светот тоа би ме направило навистина среќен, затоа што ќе можам да го остварам својот сон. Сега откако ќе наполнам 18 години ќе возам до Грција, да го посетам Солун, потоа ќе возам до Воден и таму ќе ги посетам водопадите. Од таму ќе ја поминам границата и ќе наминам до Битола, па до Прилеп и на крај се враќам во моето Неготино“, споделува Јани за следните тури што планира да ги оствари наскоро.

© CRNOBELO.com Забрането преземање и копирање. Крадењето на авторски текстови е казниво со закон.

Автор: Е. Х | Црнобело