Рената од Скопје има сопруг Словенец: „Јас бев стјуардеса, а тој пилот, свадба правевме во прекрасниот Блед, а живееме во Доха“

Што ти се допаѓа најмногу кај Словенците како партнери? И обратно – која особина на Македонките ја сакаат тие?

Словенците ми се допаѓаат бидејќи се мирни, смирени и сакаат да поминуваат што повеќе време во природа. Македонките, па се доста темпераментни и лојални.

Каде живеете сега? Позитивни и негативни страни на животот во куфери...

Веќе 6 години живееме во Доха, Катар. Доха е магична од октомври до мај, останатиот дел од годината треба да се бега оттука.

За време на летото температурите се високи, па кога влагата ќе се качи, достигнуваат до 60 Целзиусови степени и со тоа живот надвор од трговските центри како и да не постои.

Во декември, Катар беше домаќин на Светско фудбалското првенство и беше преубаво да се биде дел од таков настан. Градот беше преполн со туристи и љубители на фудбалот, па и покрај фудбалот имаше безброј настани и многу познати диџеи, изведувачи и славни лица кои имаа свои настапи.

Како позитивни страни на живот надвор од својата татковина би кажала дека е можноста да се живее во толку различен свет и да се запознаат различни култури, животот покрај море, можноста за ширење познанства со различни националности, јадење различна храна од цел свет.

Како негативна страна ќе го издвојам најголемиот фактор, а тоа е фамилијата. Постојано ни фалат сите, и на мене и на Давид, па во секое слободно време се обидуваме да ги посетиме нашите во Македонија и Словенија.

Како ти се допадна неговата родна Словенија?

Словенија е навистина посебна. Има прекрасна природа и магични планини и езера.

Имаат преубава храна, па секогаш кога ќе ја посетиме Словенија имаме неколку ресторани со локална храна, кои ни се на задолжителна листа.

Си ги знаат своите убавини, вложуваат во истите и ги негуваат.

Како нему му се допадна Македонија? Колку пати ја посетил? Која му е омилена храна?

Знам да кажам дека Давид е поголем патриот од мене, тој ја обожава Македонија.

Во неговите скоро 4 години живот во Скопје, има посетено доста од внатрешноста и има пробано сè од храна. Омилена храна му е сарма, но сака да јаде и тавче гравче, биено сирење на жар, полнети пиперки, скара, кои и јас ги спремам секако, но некако има друг шмек кога ќе седнеш во некоја македонска кафеана, па кога ќе се напиеш ракија или некое македонско вино.

Македонија ја посетуваме секоја година по неколкупати, особено за летниот период за да ги избегнеме жештините од Доха.

Каде се гледате за 20 години отсега и каде би сакале да дочекате пензија?

Ова е прашање што ќе треба да ми го поставиш за едно 15 години.

Најверојатно би биле во Словенија, но со работата на Давид повеќе би кажала кај ќе нè однесе патот, таму.

Идеален пензиски живот замислувам во некоја малечка куќа во некое предградие некаде во Италија, со свое лозје, од кое со Давид правиме домашно вино, со домашна пршута и сирење.

На следната страница повеќе фотографии од Рената и Давид....