Светскиот шампион во танц Анди Исмаили (14): „Наставничка ме исмеваше јавно, најдов начин да се справам со хејтерите“

Во една пригода кажа дека дури и некоја твоја учителка те исмевала поради твоето танцување. Ако можеш, што би ѝ порачал денес јавно?

Да, точно е дека учителка ме исмеваше.

Но, нема да ѝ дозволам да ми ги земе радоста и сјајот што го носам и нема да продолжам да зборувам за тоа, бидејќи на тој начин ѝ давам внимание какво што немала никогаш во својата кариера.

И да можев да ѝ кажам нешто јавно - не би ѝ кажал ништо.

Велат, талентот зборува сам за себе. А јас за среќа, најдов начин да ги игнорирам луѓето кои се полни со несигурност, познати како „хејтери“.

Дали танцувањето влијае на твоите оценки?

Танцувањето и учењето тешко се балансираат, но се трудам максимално да се вложам во двете сфери.

И би сакал да им се заблагодарам на професорите во моето училиште бидејќи тие ја разбираат мојата кариера и направија многу за мене, со оглед на фактот што многупати сум пропуштил часови.

Ти си четирикратен светски шампион во балет. Какво е чувството со сите овие титули и дали повторно би се натпреварувал?

Да се биде четирикратен светски шампион ми значи премногу, тоа е повеќе од титула.

Тоа е нешто што ќе го паметам додека сум жив.

И се разбира, ќе се натпреварувам и никогаш нема да се откажам додека не испишам историја.

Јас го освоив светскиот шампионат во 2019, 2021 и во 2022 година, кога се натпреварував во две категории и ги освоив двете титули.

Колку часа во текот на денот вежбаш?

Вежбам 4-5 часа на ден преку недела, секогаш после часови.

А за викенди вежбам по цел ден.

Сè уште си многу млад, но дали се гледаш себеси на некоја голема светска сцена? Кој ти е најголемиот професионален сон?

Мојот најголем сон е да живеам некаде во САД, да танцувам и да глумам во исто време.

Освен што сум танчар, јас сум и актер, а глумата е исто така моја страст.

Сакам да глумам и да танцувам, бидејќи луѓето се трогнати и емотивни по моите настапи.

Јас глумам кога танцувам, нема танц без глума и нема глума без танцување.

Кажи ми малку за твојот личен живот - каде одиш на училиште, имаш ли браќа и сестри, што правиш за забава?

Учам во гимназија во Гостивар, во прва година.

Максимално се трудам да бидам неверојатен во училиштето исто како што сум во танцот.

А браќа и сестри немам, за жал.

Со оглед на тоа што е скоро Нова година, што би си посакал за 2024-та?

Јас само се надевам дека 2024 година ќе биде добра со сите нас!

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело