Излеана канализација во Пефкохори – морето е кафеаво, привремена забрана за бањање на дел од плажата

Детали

петок, 12 јуни 2026

Во едно од најпопуларните грчки летувалишта за Македонците, Пефкохори, заради пукање на цевка за транспорт на отпадни води, излиена е канализацијата и има привремена забрана за бањање на дел од плажата, каде морето е кафеаво, додека да се изврши дезинфекција и потребни анализи.

Во текот на вчерашниот ден, во едно од најпопуларните грчки летувалишта на првиот крак, Пефкохори, заради дефект дојде до пукање на цевка за отпадни води, кои се излиле до поток, а потоа стигнаа и до морето.

Сликата од кафеаво море која ги дочекала локалците и туристите не била воопшто пријатна.

Надлежните известија дека веднаш излегле на терен и почнале да работат на санација, со што за брзо, течењето било стопирано, а дефектот бил саниран.

Но, додека се работи на перење, дезинфекција (со хлор) на зафатеното подрачје и се чекаат резултати од спроведените лабораториски анализи, привремено е донесена забрана за користење на плажата за бањање.

Не станува збор за целата плажа во Пефкохори, туку поточно за делот од брегот каде што се наоѓа бич барот Акротири, на излезот од гратчето, во зона од 200 метри од двете страни кај местото на излевање.

Се очекува ново соопштение за состојбата, откако ќе бидат завршени анализите за тоа дали морето е безбедно на почетокот на летната сезона.

М. М. | Црнобело