Успешни Македонци низ светот: Д-р Ана Кацарска е гинеколог – акушер во Дубаи

Успеавте ли да се привикнете лесно на високите температури?

Климата во Дубаи мене лично многу ми одговара. Во летните месеци е топло, но е пријатно за живеење и функционирање. Митот дека во Дубаи е премногу топло и дека не се живее не е точен.

Што е она што го прави Дубаи посебен?

Во моментот мислам дека Дубаи е град со многу можности за брз развој и прогрес во кариерата, но и самиот град нуди можности за добар квалитет на живот и добар животен стил.

Дубаи е одлично место за луѓето кои сакаат да имаат „work-life balance“.

Од друга страна е многу добро организиран град со одлична инфраструктура и исклучително безбеден, што го прави погоден за семејства.

Како функционира здравствениот систем во Дубаи?

Здравствениот систем функционира одлично. Се следат најновите протоколи и секоја технологија во здравствениот систем. Достапни се сите најнови медикаменти.

Се обрнува големо внимание на луѓето кои живеат во Дубаи да имаат лесен и брз пристап до сите здравствените услуги. Постои одлична комуникација помеѓу докторите од сите болници.

Колку често си доаѓате дома? Што ви недостасува најмногу од Македонија?

За жал во Македонија не доаѓам често. Би сакала во иднина да доаѓам почесто, сепак тоа е мојата татковина и навистина многу ми недостига.

Но, професионалните обврски се доста динамични и досега ретко наоѓав можност да дојдам. Секако дека ми фали фамилијата и пријателите кои ги имам дома, иако редовно комуницирам со нив.

Би останале ли засекогаш во Дубаи?

Дубаи е одличен град за секоја годишна возраст. Многу од луѓето остануваат овде да живеат и по завршувањето на нивната кариера, градот нуди одлични услови за живот за секоја генерација.

Рано е да се донесе одлука за тоа каде се гледам самата себеси во некоја подалечна иднина, иако сега засега би сакала да останам тука.

©CRNOBELO.com Забрането преземање и копирање. Крадењето на авторски текстови е казниво со закон.

Е. П. | Црнобело